Aqparattyq qaýipsizdik máselesiniń kóterilgenine qaramastan bul salada nátıje joqtyń qasy - senator Qýanysh Aıtahanov

Búgin QR Parlamenti Senatynyń otyrysynda «ShYU múshe memleketterdiń úkimetteri arasyndaǵy halyqaralyq aqparattyq qaýipsizdikti qamtamasyz etý salasyndaǵy yntymaqtastyq týraly kelisimdi ratıfıkatsııalaý týraly» zań jobasyn talqylaý barysynda senator Qýanysh Aıtahanov osyndaı pikir bildirdi, dep habarlaıdy QazAqparat.

«Kelisimniń birinshi qosymshasynda aqparattyq qaýipsizdikke anyqtama berilgen. Al qujattyń 2-shi babynyń ekinshi qosymshasynda halyqaralyq aqparattyq qaýipsizdik qaterleriniń qataryna myna másele jatqyzylady: 5-shi tarmaqta «basqa memleketterdiń qoǵamdyq-saıası, áleýmettik-ekonomıkalyq júıelerine, rýhanı, adamgershilik jáne mádenı ortalaryna zııan keltiretin aqparattar taratý jatqyzylǵan», deıdi. Bul másele elimizde de jıi kóterilip keledi. Atap aıtqanda, Reseı arnalary arqyly Qazaqstanǵa kúndiz-túni atys-shabysqa, zorlyq pen zombylyqqa, pornografııa men qatigezdikke toly telehabarlar berilip keledi. Tipti áke-sheshesi balasy men qyzynyń janynda otyryp teledıdar kóre almaıtyn jaǵdaıǵa da jettik. Bulardyń barlyǵy jastarymyzdy qatigezdikke tárbıleıtini sózsiz», dedi Q. Aıtahanov. Sonymen birge, senator BAQ-ta shyqqan maqalaǵa silteme jasaı otyryp, reseılik «STS-Medıa» holdıngine qatysty máseleni alǵa tarty.

Esterińizge sala keteıik, kúni keshe elimizdegi «31 telearna» tilshileri óz arnalarynyń 20 paıyz aktsııasyna ıelik etken reseılik «STS-Medıa» holdıngine qatysty málimdeme jasap, jumystan ketetindikterin jarııalaǵan bolatyn. Arna jýrnalısteriniń aıtýynsha, quryltaıshylyq aktsııanyń az ǵana bóligin ıelenip otyrǵanyna qaramastan arnanyń uıymdastyrý, shyǵarmashylyq jumystarynyń sheshimi Máskeýge táýeldi bolyp qalǵan. Tipti solardyń aıtaǵymen 2-3 jyldyń ishinde ondaǵan qazaq habarlary jabylypty, arnanyń efırlik saıasaty reseılik aqparattyq ekspansııa jaǵdaıynda turǵan kórinedi.

Osy máselelerdi alǵa tartqan depýtat Q. Aıtahanov, bundaı keleńsiz jaıttardyń aldyn alý qajettigin kóterdi.