Aqparattyq qaýipsizdik komıteti ETsQ-ny bóten adamdarǵa bermeýge úndeý jasady
«Elektrondy tsıfrlyq qoltańbanyń (ETsQ) qol qoıatyn adamnyń ózi qol qoıǵanymen birdeı dárejesi jáne teńdeı zańnamalyq kúshi bar. Bizge bóten adamdarǵa ETsQ-ny zańsyz berýi faktisine qatysty biraz shaǵymdar men materıaldar kelip túsip jatyr. Osy oraıda keńinen taraǵan jaǵdaılarǵa toqtalǵym keledi, ıaǵnı uıym basshysy ózine tıesili ETsQ-ny qaraýsyz qaldyrady nemese jumystan shyqqan qyzmetshilerdiń ETsQ-sy qaıtarylmaıdy, sondaı-aq ózderiniń elektrondy tsıfrly qoltańbasyn basqa qyzmetshilerge beredi. Osynyń saldarynan ETsQ-ny zańsyz paıdalaný jaǵdaıy oryn alady. Bul rette ETsQ-ny zańsyz berý arqyly senimgerlik rásimdelip, qarjylyq qujattarǵa qol qoıylǵan oqıǵalar anyqtaldy», - dedi R. Ábdiqalyqov Ortalyq kommýnıkatsııalar qyzmetinde.
Onyń aıtýynsha, ETsQ-ny zańsyz berý boıynsha ákimshilik ister qozǵalyp, 15-ten 50 AEK-ke deıin jaza qarastyrylǵan. 2020 jyly elektrondy tsıfrly qoltańbany zańsyz berý men onyń tıisti deńgeıde qorǵalmaýyna qatysty 30-dan astam fakti anyqtaldy. 2021 jyly osy baǵytta 6 is qaraldy.
«Osyǵan baılanysty ózderińizge tıesili elektrondy tsıfrly qoltańbany basqa adamdarǵa bermeýge jáne qaraýsyz qaldyrmaýǵa shaqyramyz. Sizden bógde adamdar ETsQ-ny talap etýge quqyly emes ekenin eske salamyz», - dedi Aqparattyq qaýipsizdik komıtetiniń tóraǵasy.