«Aqparatty qoǵam-2030» Qazaqstan ǵylymyn damytý saıasaty ázirlendi
ASTANA. 16 mamyr. QazAqparat - «Aqparatty qoǵam-2030» Qazaqstan ǵylymyn damytý saıasaty ázirlendi. Bul týraly búgin elordada «Aspandaý» ǵylymı bilim berý qorynyń prezıdenti Qanat Nurov málim etti.
«Qazaqstan ǵylymynyń búgingi basty máselesi - bul ǵylymı kadrlardyń jáne ǵylym qyzmetkerleriniń joqtyǵynda. Qoldanbaly jáne irgeli ǵylymdy basqarý men qarjylandyrýdyń jalpylyq, komandalyq-ákimshilik joldary ǵylym men bilim arasyndaǵy alshaqtyqty jeńbeı ári bilim júıesi arqyly qoǵamdaǵy ǵylymı ortany qurmaı tıisti nátıje bermeıdi. Qoǵamǵa ǵylymdy damytýdyń bilim berý doktrınasy qajet», - deıdi ol.
Q.Nurovtyń atap ótýinshe, osyǵan baılanysty qor «Aqparatty qoǵam-2030» saıasaty jobasynda bilim men ǵylym arasyndaǵy alshaqtyqty jeńýdiń birneshe sharalaryn usynǵan. Atalǵan sharalar úzdiksiz akademııalyq bilim berýdiń ulttyq úlgisin engizý, oqý-ádistemelik quraldarynyń ǵylymı mazmunyna jalpy tujyrymdamalyq talaptar qoıý, orta mekteptiń joǵary synyptarynda jáne joǵary mektepterdegi ǵylymı mektepterdi qalpyna keltirý jáne qalyptastyrý, «dalalyq» jáne qoldanbaly zertteýlerdi ońtaılandyrý, sondaı-aq irgeli zertteýlerdi qarjylandyrý syndy jaıttardy qamtıdy.
