Aqparattyq júıeler qurýmen tym áýestenip kettik — Qýanyshbek Esekeev
ASTANA. KAZINFORM — Qazaqstandy tsıfrlandyrýdaǵy negizgi máselelerdiń biri — shashyrańqy memlekettik aqparattyq júıelerdiń shamadan tys kóptigi. Bul pikirdi Qazaqstan Prezıdentiniń kómekshisi Qýanyshbek Esekeev Jibek Joly telearnasyndaǵy «Ýáde» baǵdarlamasynda aıtty.
2026 jyl tsıfrlandyrý jáne jasandy ıntellekt jyly dep jarııalandy. Spıkerdiń aıtýynsha, bul sheshim eldi túbegeıli tehnologııalyq jańǵyrtý strategııasynyń zańdy jalǵasy boldy.
Alaıda, ótken jyldary Qazaqstan kóptegen jeke aqparattyq júıeni qurýmen aınalysyp ketkenin moıyndaýǵa týra keledi. Búgingi mindet — olardy biryńǵaı tehnologııalyq platformaǵa biriktirip, damýdy qamtamasyz etý jáne shyǵyndardy azaıtý.
— Biz aqparattyq júıelerge tym qatty áýestenip kettik. Árbir protsestiń ózine jeke aqparattyq júıe jasaýǵa tyrystyq, — dedi Prezıdent kómekshisi.
Onyń aıtýynsha, qazir elimizde memlekettik organdar men kvazımemlekettik sektor sheshimderin qosa alǵanda, shamamen 700 túrli júıe bar.
Bul saladaǵy ekinshi mindet — memlekettik qyzmetterdi tolyq tsıfrlandyrý. Oǵan qajetti negiz qazirdiń ózinde qalyptasqan: Qazaqstan elektrondy qyzmet kórsetý boıynsha álemde aldyńǵy qatarda. Alaıda shynaıy transformatsııa jasandy ıntellektini engizýmen bastalady, óıtkeni ol syrtqy servısterdi ǵana emes, ishki protsesterdi de ózgertedi.
Qýanyshbek Esekeev bıliktiń júıelerdi biryńǵaı tehnologııalyq standartqa kóshirýdi josparlap otyrǵanyn atap ótti.
Aıta keteıik, tamyz aıynan bastap 500 mektepte jasandy ıntellektini pılottyq túrde engizý bastalady.
