Aqparattyq soǵys: AQSh memlekettik hatshysy men Kýba arasynda «aıtys» bastaldy
ASTANA. KAZINFORM – AQSh memlekettik hatshysy Marko Rýbıo Kýba AQSh-tyń ulttyq qaýipsizdigine qaýip tóndirip otyrǵanyn jáne eki el arasynda beıbit kelisimge kelý yqtımaldyǵy «asa joǵary emes» ekenin málimdedi, dep habarlaıdy VVS.
Bul málimdeme AQSh bıligi Kýbanyń burynǵy prezıdenti Raýl Kastrony 1996 jyly amerıkalyq azamattar qaza tapqan eki ushaqtyń atyp túsirilýine baılanysty kisi óltirdi dep aıyptaǵannan bir kún ótken soń jarııa boldy.
Marko Rýbıo Vashıngton úshin dıplomatııalyq sheshim basty tańdaý bolyp qala beretinin aıtty. Alaıda ol AQSh prezıdenti Donald Tramptyń eldi kez kelgen qaýipten qorǵaýǵa quqyǵy men mindeti bar ekenin eskertti.
Kýbanyń Syrtqy ister mınıstri Brýno Rodrıges Rýbıony «ótirik aıtty» dep aıyptap, aral memleketi eshqashan AQSh-qa qaýip tóndirmegenin málimdedi.
Beısenbi kúni jýrnalıster aldynda sóılegen Marko Rýbıo:
– Kýbamen dıplomatııa áli de bizdiń basym baǵytymyz bolyp qala beredi. Biraq qazirgi tańda kimmen jumys istep otyrǵanymyzdy eskersek, mundaı kelisimge qol jetkizý yqtımaldyǵy tómen, – dedi.
Sonymen qatar ol Kýbany «búkil aımaqtaǵy terrorızmdi qoldaıtyn negizgi memleketterdiń biri» dep atady. Bul málimdemeni Brýno Rodrıges X áleýmettik jelisindegi jazbasynda úzildi-kesildi joqqa shyǵardy.
Kýba syrtqy ister mınıstri Marko Rýbıony «áskerı agressııany arandatýǵa tyrysyp otyr» dep aıyptap, AQSh bıligi Kýbaǵa qarsy «qatigez ári júıeli shabýyl» jasap jatqanyn málimdedi.
Qazir Kýbada janarmaı tapshylyǵy kúsheıip otyr. El AQSh-tyń munaı blokadasynyń saldarynan aýyr daǵdarysty bastan keshirip otyr. Sonymen qatar Donald Tramp ákimshiligi Gavanaǵa kelisim jasaý úshin qysymdy kúsheıte bastady.
Sońǵy aılarda Kýba turǵyndary uzaqqa sozylǵan elektr jaryǵynyń óshýi men azyq-túlik tapshylyǵyna tap boldy.
Marko Rýbıo Kýbanyń AQSh usynǵan 100 mln dollar kólemindegi gýmanıtarlyq kómekti qabyldaǵanyn aıtty. Al Donald Tramp buǵan deıin Kýbaǵa qysym kórsetýdi birneshe ret kúsheıtip, eldegi kommýnıstik rejımdi qulatý múmkindigin ashyq talqylady.
Sársenbi kúni Kýbanyń burynǵy prezıdentine aıyp taǵylýy keıbir sarapshylarǵa Donald Tramptyń qańtar aıynda Venesýela prezıdenti Nıkolas Madýroǵa qarsy áreketterin eske saldy.
Jýrnalıster Raýl Kastrony AQSh-qa qalaı jetkizetini týraly suraǵanda Marko Rýbıo:
– Eger biz ony munda jetkizýge tyrysyp jatsaq, josparymyzdy nege BAQ-qa aıtýymyz kerek, – dep jaýap berdi.
Sársenbi kúni Maıamıde aıyptardy jarııalaǵan AQSh ádilet mınıstriniń mindetin atqarýshy Todd Blansh:
– Biz onyń AQSh-qa óz erkimen nemese basqa jolmen keletinin kútemiz, – dedi.
Al Donald Tramp Aq úıde jýrnalısterge bergen suhbatynda Kýbany «sátsiz memleket» dep atap, óziniń ákimshiligi olarǵa «gýmanıtarlyq negizde» kómektesýge tyrysyp jatqanyn aıtty. Onyń sózinshe, kýbalyq amerıkalyqtar «óz eline oralyp, Kýbanyń tabysty bolǵanyn qalaıdy».
– Basqa prezıdentter bul máselege 50-60 jyl boıy qarap keldi. Biraq muny júzege asyratyn men bolatyn sııaqtymyn. Sondyqtan muny isteýge qýana keliser edim, – dedi Donald Tramp.
Aıta keteıik, buǵan deıin AQSh Raýl Kastro men Kýbanyń bes azamatyna aıyp taqqanyn jazdyq. Sondaı-aq Tramp ákimshiligi Kýbaǵa qarsy áskerı kúsh qoldanýdy qarastyryp jatqany da habarlandy.
