Aqparattyq qaýipsizdik týraly zań jobasy Senat qaraýyna jiberiledi
Qazaqstan Respýblıkasynyń keıbir zańnamalyq aktilerine aqparattyq qaýipsizdik máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy Májilistiń ekinshi oqylymynda qaralyp Senattyń qaraýyna usynyldy, dep habarlaıdy Kazinform.
«Atalǵan zań jobasy bıyl 27 qyrkúıekte birinshi oqylymda maquldandy. Zań jobasymen jumys barysynda Májiliste birqatar tolyqtyrý engizildi. Derbes derekter jáne olardy qorǵaý týraly zańnamasynyń saqtalýyna memlekettik baqylaý júrgizý tártibi engizildi. Tsıfrlyq damý, ınnovatsııalar jáne aeroǵarysh ónerkásibi mınıstrliginiń Aqparattyq qaýipsizdik komıteti baqylaýshy organ. Azamattarǵa banktik qaryzdar men mıkrokredıtter alýdan erikti túrde bas tartýdy belgileý quqyǵyn berý. Tyıym salýdy «elektrondyq úkimettiń» jeke kabınetinde belgileýge bolady», - dedi QR Parlamenti Májilisi ekonomıkalyq reforma jáne óńirlik damý komıtetiniń hatshysy Ekaterına Smyshlıaeva Májilis otyrysynda.
Depýtattyń baıandaýynsha, erikti bas tartý týraly aqparat qaryzdardy maquldaý kezinde eskeriledi. Bul úshinshi tulǵalardyń banktik qaryzdar men mıkrokredıtter alýyn boldyrmaýǵa múmkindik beredi.
Derbes derekterdi qamtıtyn bazalardyń menshik ıeleri men operatorlarynyń bir jumys kúni ishinde ýákiletti organǵa derbes derekter qaýipsizdiginiń buzylǵany týraly habarlaý mindeti engiziledi.
«Azamattar ózderiniń derbes derekterimen jasalǵan barlyq operatsııa týraly jeke kabınettegi habarlamalar nemese sms arqyly biledi. Sonymen qatar depýtattar zań jobasynyń jekelegen normalaryn naqtylaıtyn jáne mazmunyn jaqsartatyn túzetýlerdi engizdi. Zań jobasy boıynsha toqsan jeti túzetý kelip tústi. Olar jumys tobynyń jáne komıtettiń keńeıtilgen otyrystarynda qaraldy. Qorytyndy salystyrmaly keste qabyldanǵan qyryq alty pozıtsııadan turady», - deıdi ol.
