UQShU Syrtqy ister mınıstrleri birlesken málimdeme jasady
ShOLPAN-ATA. KAZINFORM – Qyrǵyzstannyń Sholpan-Ata qalasynda Ujymdyq qaýipsizdik týraly shart uıymynyń Syrtqy ister mınıstrleri keńesiniń otyrysy ótti. Jıynǵa UQShU-ǵa múshe Qazaqstan, Reseı, Belarýs, Tájikstan jáne Qyrǵyzstan ókilderi keldi.
Shaǵyn jáne keńeıtilgen formattaǵy kezdesýlerde syrtqy ister mınıstrleri halyqaralyq jáne óńirlik jaǵdaı jóninde, onyń UQShU-ǵa múshe memleketterdiń qaýipsizdigine áseri týraly pikir almasty.
− Delegatsııa basshylary Ortalyq Azııa men jalpy óńirdegi qaýipsizdikke qatysty negizgi máselelerdi talqylady. Terrorızmmen, ekstremızmmen jáne transulttyq qylmyspen kúres máselelerine erekshe kóńil bólindi. Bul qazir álemdegi basty qaýip-qaterdiń biri bolyp otyr. Osyǵan oraı, is-qımyldy jedeldetip ári tıimdiligin arttyrý úshin kúsh-jigerdi ári qaraı úılestirý jóninde sheshimder qabyldandy, − dedi Qyrǵyzstannyń Syrtqy ister mınıstri Jeenbek Qulýbaev BAQ-qa málimdemesinde.
Sonymen birge, otyrys qorytyndysy boıynsha tórt birlesken málimdeme qabyldandy:
• terrorızm men ekstremızmge alyp keletin radıkaldanýǵa qarsy is-qımyl týraly;
• halyqaralyq aqparattyq qaýipsizdik máseleleri jóninde;
• Ortalyq Azııa men Aýǵanstan úshin ornyqty damý maqsattary boıynsha BUU Óńirlik ortalyǵyn qurý týraly;
• Taıaý Shyǵystaǵy ahýalǵa baılanysty.
− Aımaqaralyq yntymaqtastyqtyń mańyzdylyǵyn erekshe atap ótkim keledi. Qazir qaýipsizdikke tónetin qaterler shekaramen shektelmeıdi. Sondyqtan tıimdi áreket etý úshin UQShU aıasyndaǵy úılestirilgen is-qımyldarmen qatar basqa aımaqtyq jáne halyqaralyq uıymdarmen tyǵyz yntymaqtastyq qajet. Qyrǵyz Respýblıkasy UQShU negiz etken ujymdyq qaýipsizdik pen yntymaqtastyq prıntsıpterine berik ekenin rastaıdy. Biz tájirıbe almasýdy, birlesken jattyǵýlar ótkizýdi, sondaı-aq basqa halyqaralyq jáne óńirlik uıymdarmen áriptestikti keńeıtip, praktıkalyq yntymaqtastyqty tereńdetýdi qoldaımyz, − dedi Qyrǵyzstan mınıstri.
Osy oraıda, UQShU, ShYU jáne TMD arasyndaǵy yntymaqtastyqty damytý jónindegi Jol kartasy qabyldandy.
− Halyqaralyq ahýal turaqsyz kezeńde ujymdyq qaýipsizdik máseleleri tek basymdyq emes, UQShU-ǵa múshe barlyq memleketter úshin strategııalyq mindet (ımperatıv) bolyp otyr. Óńirde jáne jalpy álemde bolyp jatqan sońǵy oqıǵalar qaýipsizdik pen turaqtylyqtyń túrli aspektilerine qatysty kelisilgen ustanymdar qalyptastyrý qajettigin aıqyndaı tústi. Búgin qol jetkizilgen ýaǵdalastyqtar óńirdegi ıntegratsııalyq protsesterdi tereńdetý men ujymdyq qaýipsizdikti arttyrýǵa berik negiz bolaryna senimdimiz, − dedi Jeenbek Qulýbekov.
Premer-mınıstrdiń orynbasary – Syrtqy ister mınıstri Murat Nurtileý otyrys qatysýshylaryn UQShU aıasyndaǵy yntymaqtastyq máselelerine qatysty Qazaqstannyń ustanymy men kózqarastary týraly habardar etip, uıymdy jan-jaqty ári odan ári damytýǵa baǵyttalǵan usynystaryn aıtty.
Aıta keteıik, 2025 jyly uıymǵa Qyrǵyzstan tóraǵalyq etedi. Kelesi Syrtqy ister mınıstrleri keńesiniń otyrysy 2025 jyldyń tórtinshi toqsanynda, UQShU Ujymdyq qaýipsizdik keńesi sessııasynyń qarsańynda Bishkek qalasynda ótetin boldy.
Eske sala ketsek, mamyr aıynda UQShU parlamentshileri Bishkekte bas qosyp, esirtki jáne kıberqylmysqa qarsy birlesken sharalardy talqylaǵan edi.