Aqparattyq bazadaǵy málimetterdi jelige nemese alaıaqtarǵa bergeni úshin jaýapkershilik engizilmek
ASTANA. KAZINFORM — Premer-Mınıstr Oljas Bektenov Quqyq buzýshylyqtyń aldyn alý jónindegi vedomstvoaralyq komıssııanyń otyrysyn ótkizdi. Jıynda ınternet-alaıaqtyqqa qarsy kúres jáne qarjy pıramıdalarynyń aldyn alý sharalary qaraldy. Bul týraly Úkimettiń baspasóz qyzmeti málim etti.
Іshki ister mınıstri keltirgen málimetke súıensek, alaıaqtyqqa qarsy is-qımyl sheńberinde «Kıberpol» arnaıy toptarymen 2,5 myńnan astam qylmys ashylǵan. Nátıjesinde 962 mln teńge kólemindegi shyǵyn ótelgen. 914 qylmysker ustalyp, jalǵan nómirlerden túsken 58 mln qońyraý buǵattalǵan.
Qarjy monıtorıngi agenttiginiń málimetteri boıynsha, bıyl 43 qarjy pıramıdasy anyqtalyp, messendjerlerdegi 266 chat jabylǵan. Osylaısha, 2 mln-ǵa jýyq azamattyń qarjylyq shyǵynynyń aldyn aldy.
«Kıberqadaǵalaý» júıesi 8 myńnan astam alaıaqtyq sıpattaǵy saıtty buǵattady.
Premer-Mınıstr Oljas Bektenov alaıaqtyq shemalar úzdiksiz damyp kele jatqandyqtan birqatar baǵyt boıynsha jumysty kúsheıtýdi tapsyrdy.
«Memleket basshysy ınternet-qylmystardy erte anyqtaý men jolyn kesý máselesine basa nazar aýdara otyryp, olarǵa qarsy is-qımyl sharalaryn kúsheıtýdi birneshe ret tapsyrdy. Onlaın-kredıtterdi resimdeýge, banktik jınaqtardy urlaýǵa baılanysty áreketterdiń kópshiligi shetelden otyryp jasalady. Onyń ústine aqparattyq bazadaǵy málimetterdi jelige nemese alaıaqtarǵa berý boıynsha da jaýapkershilik joq. Sondyqtan múddeli memlekettik organdar bank shottaryn, kartalardy, jeke kýáliktegi derekterdi, telefon nómirleriniń bazalaryn bóten adamdarǵa qasaqana bergeni úshin jaýapkershilikti engizý máselesin pysyqtaýy qajet», — dep atap ótti Oljas Bektenov.
