Aqparatqa quqyq - bul adamzattyń irgeli quqyqtarynyń biri - J. Asanov
ANA. 14 jeltoqsan. QazAqparat /Qanat Mámetqazyuly/ - Aqparatqa quqyq - bul adamzattyń irgeli quqyqtarynyń biri. Búgin QR Parlamenti Májilisinde «Aqparatqa qol jetimdilik máselesin zańnamalyq retteý salasyndaǵy elderdiń ozyq tájirıbesi» atty taqyryptaǵy dóńgelek ústel barysynda Májilistiń Zańnama jáne sot-quqyqtyq reforma komıtetiniń múshesi Jaqyp Asanov osylaı málim etti.
«Aqparatqa qoljetimdilik - demokratııalyq memlekettiń mańyzdy atrıbýttarynyń biri. Bul másele kez kelgen órkenıetti, demokratııalyq qoǵam úshin ózekti. Sonymen qatar, jarııalyq aqparatqa qoljetimdilik sońǵy ýaqytta Qazaqstanda keńinen talqyǵa túsip otyrǵan mańyzdy máselelerdiń biri. Bul túsinikti. Óıtkeni, aqparatqa quqyq - bul adamzattyń irgeli quqyqtarynyń biri», - dedi J. Asanov.
Depýtattyń aıtýynsha, Qazaqstan óz táýelsizdigin alǵannan beri adamnyń quqy men bostandyǵyn qorǵaýǵa baǵyttalǵan birqatar mańyzdy sharalardy júzege asyryp keledi. Onyń ishinde, azamattardyń aqparatqa qoljetimdiligin qamtamasyz etý máseleleri de qamtylyp otyr. «Búgingi kúni qazaqstandyqtardyń úshten biri ınternetpen únemi jumys isteıdi. Ǵalamtor kún ótken saıyn eń qoljetimdi aqparat kózine aınalyp otyr», -dedi depýtat.
