Aqparatqa qoljetimdilikti zańnamalyq retteý halyqaralyq standarttarǵa negizdelýi kerek - EQYU Ortalyǵynyń basshysy
ANA. 14 jeltoqsan. QazAqparat /Qanat Mámetqazyuly/ - Aqparatqa qoljetimdilikti zańnamalyq retteý halyqaralyq standarttarǵa negizdelýi kerek. Búgin QR Parlamenti Májilisinde «Aqparatqa qoljetimdilik máselesin zańnamalyq retteý salasyndaǵy elderdiń ozyq tájirıbesi» atty taqyryptaǵy dóńgelek ústel barysynda EQYU Astanadaǵy Ortalyǵynyń basshysy Aleksandr Kelchevskıı osylaı málim etti.
«Aqparat demokratııalyq qoǵamda mańyzdy ról atqaryp qana qoımaıdy, qoǵam progresi úshin úlken mánge ıe. Bul qoǵamnyń damýyna, adamnyń basqa da quqyqtary men negizgi bostandyǵynyń júzege asýyna septigin tıgizedi. Adam quqy jónindegi jalpyǵa ortaq deklaratsııanyń 19-y baby boıynsha «árbir adamnyń pikir erkindigi men ony bildirý erkindigine, ári esh kedergisiz óz pikirinde qalý quqyna da ıe». EQYU qatysýshy memleketter de osy qaǵıdattardy saqtaý men syılaý jolyn ustanatyndyqtaryn málimdep keledi. Árıne, demokratııalyq qoǵamda memleket azamattardyń aqparat alýyna qoljetimdilikti qamtamasyz etýi shart. Al aqparatqa qoljetimdilikti zańnamalyq retteý halyqaralyq standarttarǵa negizdelýi kerek», - dedi A. Kelchevskıı.
Ortalyq dırektorynyń aıtýynsha, bundaı zańnama birneshe baǵyttardy qamtýǵa járdemdesýi shart. «Birinshiden, qoǵamnyń memlekettik organ qyzmetterin baqylaýǵa jol ashýy kerek. Ekinshiden, bılikti jeke basyna paıdalanýdyń aldyn alýǵa septigin tıgizýi jáne qoǵamnyń bılikke senimin arttyrýy kerek. Úshinshiden, jurtshylyq qoǵamnyń tirshilik áreketine keńinen aralasýy tıis. Osyǵan oraı, zańnama qoǵamnyń múddesin eskerip, belgili bir aqparattardy alýyna qoljetimdilikti qamtýy kerek», - dedi A. Kelchevskıı.
«Keı jaǵdaıda qaısybir memleketterdiń úkimetteri ózderiniń azamattarynyń aqparat alý quqyn shektep, osy turǵydaǵy ózderiniń áreketterin ulttyq qaýipsizdikpen, memlekettik qupııamen aqtap jatady. Jeke tulǵalardyń quqyn qorǵaý men olardyń jeke ómirine qolsuqpaýshylyqty da alǵa tartatyndar bar. Bul turǵyda ulttyq qaýipsizdikti qorǵaý máselesi azamattardyń tıisti aqparat alýyn shekteýge syltaý bolmaýy kerek. Árıne, jeke ómirge quqyq ta halyqaralyq qabyldanǵan qaǵıdat. Alaıda, áńgime jurttyń aldynda júretin tulǵa týraly bolǵan jaǵdaıda, onda bul basqa azamattardyń aqparatqa qoljetimdiligin shektemeýi kerek», - dedi ol.
