Aqparatqa qol jetkizý quqyǵyn zańsyz shektegeni úshin memlekettik organdardyń jaýapkershiligi kúsheıtilmek

ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine aqparatqa qol jetkizý jáne qoǵamdyq qatysý máseleleri boıynsha ózgerister men tolyqtyrýlar engizý týraly» Zań birinshi oqylymda maquldandy.

«Zań jobasy aıasynda 3 kodekske jáne 2 Zańǵa ózgeris engizý kózdelgen. Jobany ázirleýge halyqaralyq jáne otandyq saraptama uıymdary belsene qatysty. Zań jobasynyń negizgi maqsaty – azamattardyń aqparatqa qoljetimdiligin barynsha keńinen qamtamasyz etý, memlekettik organdardyń ashyqtyǵy men belsendiligin arttyrý, jaýapkershilikti kúsheıtý. Azamattardyń aqparatyna keńinen qol jetkizýi – ol sybaılas jemqorlyqqa qarsy kúres pen bıýdjet qarajatynyń jumsalýyna baqylaý turǵysynda óte ózekti. Zań jobasynda memlekettik sektorda aqparatqa qol jetkizý týraly zańdy jıi jáne júıeli buzýǵa jol bermeý, memlekettik organdary resmı aqparatty proaktıvti túrde jarııa etýdi qamtamasyz etý, múgedektigi bar adamdardyń aqparatqa qoljetimdiligin arttyrý qarastyrylǵan», - dedi zań jobasyn tanystyrǵan Mádenıet jáne aqparat mınıstriniń mindetin atqarýshy Danııar Qadyrov.

Zań jobasynda:

- aqparatqa qol jetkizý quqyǵyn zańsyz shektegeni úshin memlekettik organdardyń jaýapkershiligin kúsheıtý;

- aqparatqa qol jetkizý salasynda memlekettik baqylaýdy engizý;

- aqparattyń ashyqtyǵy prezýmptsııasy men aqparatty proaktıvti túrde taratý qaǵıdattaryn bekitý;

- múgedektigi bar adamdarǵa aqparatqa qol jetkizý úshin qajetti jaǵdaılar jasaý jáne taǵy basqa baǵyttalǵan normalar usynylǵan.

Buǵan qosa, zań jobasynda depýtattardyń zań jobalaý qyzmetiniń tártibin ózgertý jónindegi normalar kózdeldi. Olar jumys tobynyń otyrysynda talqylaý barysynda alyp tastaldy.