«Aqparatqa qol jetkizý týraly» QR Zańy joǵary halyqaralyq baǵalaýǵa ıe boldy
ASTANA. QazAqparat - 2-6 mamyrda Jenevada ótken Aqparattyq qoǵam máseleleri jónindegi dúnıejúzilik forýmǵa qatysýshylar «Aqparatqa qol jetkizý týraly» QR Zańyn qarap, sarapshylyq top músheleri barynsha kóp oń retsenzııalar bergen.
Osy jaıynda Májiliske Halyqaralyq elektr baılanys odaǵynyń Bas hatshysy Hoýlın Chjao myrzanyń atynan alǵys hat kelip tústi.
Forýmǵa qatysýshylar QR Parlamenti Májilisiniń Qazaqstan azamattary úshin qolaıly aqparattyq orta qurýǵa qatysty eleýli kúsh-jigerin erekshe atap ótken, dep habarlaıdy Májilistiń baspasóz qyzmeti.
2015 jylǵy 16 qarashada «AShYQ úkimet» qurý úshin zańnamalyq baza daıyndaǵan «Aqparatqa qol jetkizý týraly» Zań qabyldandy. Zańnyń negizgi ıdeıasy - azamattardyń aqparat alýǵa konstıtýtsııalyq quqyǵyn iske asyrý bolyp tabylady.
Zańmen aqparat berýge mindetti sýbektiler tizbesi keńeıtildi, aqparat túrleri, olardy usyný tásilderi júıege túsirilip, keńeıtildi, memlekettik organdar basshylarynyń jyl saıynǵy ashyq baıandamalar jasaý praktıkasy engizildi.
Azamattar men zańdy tulǵalarlardyń aqparat alýǵa quqyqtaryn iske asyrý maqsatynda «Elektrondyq úkimet» veb-portalynyń tıisti komponentterinde biryńǵaı modýl jasaldy, ol «Ashyq derekter», «Ashyq NQA», «Ashyq bıýdjet» sııaqty úsh komponentten turady. Jyl sońynda «Memlekettik organdar qyzmetiniń tıimdiligin baǵalaý» sııaqty tórtinshi komponentti ashý josparlanyp otyr.
Tutastaı alǵanda, «Aqparatqa qol jetkizý týraly» Zań memlekettik organdar qyzmetiniń ashyqtyǵyn qamtamasyz etedi, azamattardyń memleketti basqarýdaǵy quqyqtary men múmkindikterin keńeıtip, sybaılas jemqorlyqpen kúresti kúsheıtedi.
