Aqparat jáne qoǵamdyq damý mınıstrligi salalyq jýrnalısterdi daıarlaýǵa basymdyq bermek

NUR-SULTAN. QazAqparat – Aqparat jáne qoǵamdyq damý mınıstrligi aldaǵy jumysynda salalyq jýrnalısterdi daıarlaýǵa basymdyq bermek. Bul týraly Astana Media Week 2020 sharasynyń ««Pandemııa jáne BAQ-qa senim daǵdarysy» plenarlyq sessııasynda Aqparat jáne qoǵamdyq damý vıtse-mınıstri Kemelbek Oıshybaev málim etti, dep habarlaıdy QazAqparat tilshisi.

«Pandemııaǵa baılanysty biz salalyq jýrnalıstıkany kúsheıtý kerektigin kórip otyrmyz. Belgili bir taqyrypty keńinen biletin jýrnalıster sol salanyń kópshilikke qyr-syryn tereńinen túsindirip bere alady. Ásirese pandemııa ýaqytynda medıtsına salasynyń jýrnalısteriniń mańyzy aıqyn kórindi. Sebebi keıde qoǵamnyń tynyshtyǵy jýrnalıstiń kásibı túrde túsindirip bergen materıalyna baılanysty bolady. Ókinishke qaraı, ártúrli úreıli rolıkterdi taratqan «sarapshylar men spıkerlerdi» kórdik. Olar jantalasa jan-jaqqa ártúrli messedjderdi taratýmen boldy. Osy arqyly qoǵamǵa dúrbeleń týdyrǵysy kelgender kezdesti», - dedi Kemelbek Oıshybaev.

Vıtse-mınıstrdiń aıtýynsha, salalyq jýrnalıster jetkilikti bolǵan jaǵdaıda, jaǵdaı bulaı shıelenispes edi.

«Sondyqtan Aqparat jáne qoǵamdyq mınıstrligi dál osy salalyq jýrnalısterdi daıarlaýdy óz jumysynyń basymdyǵy retinde aıqyndap aldy. Biz L.Gýmılev atyndaǵy EUÝ-men jáne Ál-Farabı atyndaǵy QazUÝ-men memorandýmǵa qol qoıyp, salalyq jýrnalısterdi daıarlaý josparyn da quryp qoıdyq. Osy baǵytta tipti ınstıtýttar men ýnıversıtetter oqytý ádistemesin de ózgertip jatyr», - dedi ol.

Aıta ketsek, eloradada Astana Media Week 2020 sharasy ótkizilýde. Іs-sharanyń negizgi maqsaty – otandyq medıasalany damytý men ındýstrııadaǵy iskerlik qarym-qatynasty aımaqtyq jáne halyqaralyq deńgeıde ilgeriletý. Medıa aptalyq tórtinshi jyl qatarynan álemniń túpkir-túpkirinen jetekshi sarapshylardy dástúrli túrde jınap keledi jáne ózekti taqyryptar talqylanady.