Aqparat jáne qoǵamdyq damý mınıstri Bas múftımen kezdesti

NUR-SULTAN. QazAqparat - Aqparat jáne qoǵamdyq damý mınıstri Asqar Ýmarov Bas múftı Naýryzbaı qajy Taǵanulymen kezdesti. Kezdesý barysynda Qazaqstan musylmandary dinı basqarmasynyń qyzmetine qatysty ózekti máseleler talqylandy.

​​Áńgime barysynda taraptar qoǵamdaǵy destrýktıvti dinı aǵymdardyń ıdeologııasyna qarsy is-qımyl boıynsha syndarly pikir almasty. Sondaı-aq, aqparat taratýdyń túrli arnalaryn, atap aıtqanda BAQ, áleýmettik jeli, messendjerler, kitaptar jáne t.b. quraldardy paıdalana otyryp, Múftııattyń aǵartý jumysynyń sapasyn jahandyq trendterge sáıkes jańa deńgeıge kóterý týraly da sóz boldy.
Mınıstr qańtardaǵy qaıǵyly oqıǵalar kezinde musylman qaýymǵa úndeý jasap, jurtty birlikke, beıbitshilikti saqtaýǵa shaqyrǵan azamattyq ustanymy úshin Bas múftıge zor alǵys bildirdi.

«Qazaqstan musylmandary dinı basqarmasy elimizdegi konfessııaaralyq kelisimdi nyǵaıtýǵa yqpal ete otyryp, udaıy halqymyzdy rýhanı qundylyqtar tóńiregine toptasýǵa úndep keledi», - dep atap ótti A.Ýmarov.

Kezdesý qorytyndysy boıynsha taraptar mınıstrlik pen Qazaqstan musylmandary dinı basqarmasy arasyndaǵy tyǵyz yntymaqtastyqty odan ári jalǵastyrýǵa daıyn ekendikterin bildirdi.