Aqparat saıasatyn túbegeıli qaıta qaraý qajet – Memleket basshysy

ASTANA. QazAqparat – Kreatıvti ındýstrııany jańa deńgeıge kóterýimiz kerek. Bul týraly Túrkistanda ótip jatqan Ulttyq quryltaıdyń «Ádiletti Qazaqstan – Adal azamat» atty ekinshi otyrysynda Prezıdent Qasym-Jomart Toqaev aıtty, dep habarlaıdy QazAqparat tilshisi.

«Besinshi másele – aqparat saıasatynyń tıimdiligin arttyrý, kreatıvti ındýstrııany damytý. Mass-medıa – elimizdi jańǵyrtý isine erekshe yqpal etetin sala. Sondaı-aq, bılik pen qoǵam arasyndaǵy pármendi baılanys quraly. Aqparat quraldarynda túrli kózqarastar toǵysady. Ony qoǵam tynysynyń barometri deýge bolady. Osy saladaǵy ózekti máselelerdi sheshý úshin aqparat saıasatyn túbegeıli qaıta qaraý qajet», - dedi Qasym-Jomart Toqaev.

Memleket basshysy kreatıvti ındýstrııany jańa deńgeıge kóterýimiz kerektigin de basa aıtty.

«Qazir medıa salasy, kıno jáne serıal, mýltfılm, sport jáne mýzyka shoýlary, kompıýter oıyndary men kitaptar – bári birigip, birtutas júıege aınaldy. Bul júıe ozyq qundylyqtar men qasıetterdi qalyptastyrýǵa yqpal etedi. Bizdiń bul saladaǵy áleýetimiz orasan zor. Ony tolyqqandy júzege asyrý úshin naqty sharalar qabyldaý qajet», - dedi Prezıdent.