Aqparat salasynda 100-den asa alaıaqtyq qylmys ashyldy - ІІM
ASTANA. QazAqparat - Elimizde aqparat jáne baılanys salasyndaǵy quqyq buzýshylyqtyń jedel aldyn alý boıynsha «Hi-tech» sharasy ótti, dep habarlaıdy QazAqparat QR Іshki ister mınıstrliginiń baspasóz qyzmetine silteme jasap.
«El aýmaǵynda «Hi-tech» jedel aldyn alý sharasy ótkizildi. Bul sharanyń maqsaty - aqparattandyrý jáne baılanys salasyndaǵy quqyq buzýshylyqtardy ashý, anyqtaý jáne jolyn kesý, sondaı-aq tyıym salynǵan ónimder men olardy zańsyz kóbeıtip, taratqan adamdardy anyqtaý», - delingen habarlamada.
Mınıstrliktiń málimetine súıensek, arnaıy operatsııa barysynda 99 quqyq buzýshylyq anyqtaldy. Odan bólek, aqparattyq júıeni paıdalanýshylarǵa qatysty buryn oryn alǵan 104 alaıaqtyq qylmys ashyldy.
«Sondaı-aq zańsyz aınalymnan 4 myń, sonyń ishinde 3,6 myń kontrafaktilik ónim alyndy. Pornografııalyq jáne lıtsenzııalanbaǵan baǵdarlamalyq qamtý ónimderi bar tasymaldaǵyshtar tárkilendi», - dep habarlaıdy ІІM.
Búginde anyqtalǵan quqyq buzýshylyq faktileri boıynsha saraptama taǵaıyndaldy, sotqa deıingi tergeý qorytyndysy boıynsha protsessýaldyq sheshim qabyldanady.
