Aqparat mınıstrligi «Rýhanı jańǵyrý» baǵdarlamasyn jańa jaǵdaıǵa beıimdemek
«Qazirgi tańda mınıstrliktiń aldynda «Rýhanı jańǵyrý» baǵdarlamasyn jańa jaǵdaıǵa beıimdeıtin birqatar mindet tur. Onyń negizgisi – bul ulttyq erekshelikti saqtaı otyryp, qazaqstandyqtardyń qazirgi zamanǵy syn-talaptarǵa tótep bere alatyn jáne jeke kásibı qasıetterin damytatyn is-sharalar. Bul rette bizdiń qolymyzda qazirgi tańda birneshe arnaıy jobanyń nusqalary bar. Máselen, pragmatıkalyq ómir saltyn dáripteıtin, únem qýaty umyt bolǵan, biraq, izgilik jáne tárbıelik qundylyq turǵysynan qazirgi zamanda ózekti bolyp sanalatyn salt-sanany dáripteıtin «Dástúr men ǵuryp«, eldiń quqyqtyq mádenıetin ashatyn «Quqyqtyq mádenıet», eńbekqorlyq, masyldyqtan bas tartý sııaqty qasıetterdi dáripteıtin «Eńbek eldiń muraty« degen bastamalar bar», - dedi vıtse-mınıstr Ortalyq kommýnıkatsııalar qyzmetindegi baspasóz máslıhatynda.
Vıtse-mınıstrdiń aıtýynsha, olardyń qamtıtyn taqyryptyq aıasy ataýynan áldeqaıda keń. Atap aıtqanda, oǵan óskeleń urpaqtyń minez-qulqyn qalyptastyrý, salaýatty ómir salty mádenıeti, estetıkalyq talǵamǵa baýlý, ıaǵnı tamaqtaný mádenıetinen bastap mýzyka, ádebıet, teatr sııaqty tereń dúnıelerdi qabyldaý, azamattardyń ózńiniń qarapaıym quqyqtaryn qorǵaı bilýi, kásip jasaý sııaqty qabiletterin arttyrý jáne basqalary kiredi.
«Mysalǵa alar bolsaq, ótkende el Prezındetiniń kótergen úlken bastamasy – qoǵamnyń ekologııalyq saýatyn ashý men ekomádenıetin kóterý máselesi de kiredi. Nemese «Kitapsúıer ult« uranymen jastardy, ásirese, mektep jasyndaǵy balalardy kitap oqýǵa baýlýdyń mańyzy zor. Óıtkeni, ózderińiz bilesizder, kitap qashanda rýhanı kemeldiktiń birden-bir ólshemi bolǵan, bola da bermek», - dedi Bolat Tilepov.
