Aqparat mınıstrligi BAQ-taǵy oıyn-saýyq kontentin azaıtýdy usyndy
«Jalpyulttyq aza tutý kúni eń aldymen BAQ qyzmetinde jáne olardyń ınternet-resýrstaryn rásimdeýge baılanysty birqatar sharalardyń saqtalýy quptalady. Jalpyulttyq aza tutý kúni medıa-saıttardyń joǵarǵy bóligine oqıǵa bolǵan kúndi jáne «Qazaqstan Respýblıkasyndaǵy jalpyulttyq aza tutý kúni» degen jazýy bar banner ornalastyrý usynylady. Bannerdiń túsi qara, mátinniń túsi aq bolýy kerek. Mátinniń tili paıdalanýshy tańdaǵan tildik nusqaǵa baılanysty ózgerýi tıis. Banner arqyly oqyrman qaıǵyly oqıǵa týraly aqparattardy ashýy kerek. Saıttyń tutas tústik gammasyn qara jáne aq tústerge ózgertińiz. Telearnalardyń logotıpin aq-qara túske boıaýǵa bolady», - dep jazylǵan mınıstrliktiń resmı habarlamasynda.
Jalpyulttyq aza tutý kúni barlyq BAQ saıttarynan jarnamalyq bannerlerdi, kóńil kóterý jáne ınteraktıvti elementterdi, mýzykalyq súıemeldeýdi alyp tastaý usynylady. Jalpyulttyq aza tutý kúnine baılanysty barlyq materıaldarda pikir jazý fýnktsııasyn óshirý qajet. Mundaı shara oqıǵa týraly kóptegen jaǵymsyz pikirlerdiń aldyn alady.
«Aza tutý kúni barlyq BAQ (baspa, ınternet-resýrstar, teledıdar jáne radıoarnalar) oıyn-saýyq materıaldaryn jarııalamaǵany lázim. Radıoarnalarǵa tynysh, baıaý yrǵaqty (otandyq) mýzykalyq týyndylardy qoıý usynylady. «Jarnama týraly» Zańnyń 8-babynyń 4-tarmaǵyna sáıkes, barlyq telearnalar men radıoarnalar kestesinen jarnamalar alynýy tıis. Sondaı-aq, basylym betterinde de jarnamalyq materıaldardy alyp, túrli-tústi betterdi aq-qaraǵa aýystyrǵan jón», - delingen habarlamada.
Barlyq aqparat quraldaryna arandatýshylyq fotosýretterdi, sonyń ishinde máıitterdiń, qannyń sýretterin jarııalamaý suralady. Telearnalarda tańǵy jáne efır sońynda gımn oryndalǵannan keıin qaza tapqandardy eske alý úshin bir mınýt únsizdik jarııalap, jalpyulttyq aza sebepterin kórsetý usynylady.
