Aqparat mınıstri ótip bara jatqan jyldyń basty oqıǵalaryn atady

NUR-SULTAN. QazAqparat – Aqparat jáne qoǵamdyq damý mınıstri Dáýren Abaev bıylǵy jyldyń basty oqıǵalary men jetistikterin atady, dep habarlaıdy QazAqparat.

«Bıylǵy jyl óte mazmundy boldy. Jańa Prezıdentti saılap aldyq. Saıası tranzıt kezeńinen turaqty jaǵdaıda óttik. Álbette, halyqty áleýmettik qorǵaý saıasaty jańa satyǵa kóterildi. Ataýly áleýmettik kómekti bul kúnde júz myńdaǵan azamat alyp otyr. Mehanızm árıne, jetildirile bermek. Memlekettiń qoldaýymen 400 myńǵa tarta azamat jumysqa ornalasty. Bıyl 5 myń shaqyrymǵa jýyq avtokólik joly salynyp, jóndeldi. Bul qashyqtyq – Aqtaý men Óskemenniń arasynan da alshaq. 250-ge tarta aýrýhana men mektep ashylyp, jumysyn bastady», - dedi Dáýren Abaev Habar arnasynan kórsetilgen «Ashyq dıalog» baǵdarlamasynda.

Mınıstr óz sózinde qazaqstandyq sporshylardyń baǵyndyrǵan belesterin umyt qaldyrǵan joq.

«Bıyl bıik beleske jetken sportshylar kóp. Sonyń biri – Elızabet Tursynbaeva. Ol álem birinshiliginde júlde alǵan qazaqstandyq mánerlep syrǵanaýshy. Álem chempıony atanǵan boksshy Bekzat Nurdáýletov qazaqstandyqtardyń esinde qaldy. «Manchester ıÝnaıtedti» tiz búktergen «Astana» komandasynyń da jeńisin – tarıhı jeńis dep aıtýǵa bolady. «Barys» ta bárimizdi qýantyp jatyr. Erjan Maksım men Dımashtyń bıigin aıta ketýge bolady. Basty nıýsmeıkerler - qarapaıym adamdar: dárigerler, qutqarýshylar men muǵalimder. Olar kún saıyn erlik jasap júrgen jandar. Eńbekteri kórinbeıtin de shyǵar. Biraq, olardyń eńbekteri myńdaǵan qazaqstandyq úshin asa mańyzdy. Bıylǵy jyl sátti boldy dep aýyz toltyryp aıtýǵa bolady», - dedi ol.