Aqparat mınıstri tsıfrlyq efır taratýdy engizý qashan aıaqtalatynyn aıtty

ASTANA. QazAqparat - 2018 jyldyń sońyna deıin elimizdiń barlyq óńiri tsıfrlyq efır taratýǵa 100 paıyz kóshedi. Bul týraly búgin elordadaǵy «Qazmedıa» ortalyǵynda ótip jatqan  halyqpen eseptik kezdesý barysynda QR Aqparat jáne kommýnıkatsııalar mınıstri Dáýren Abaev aıtty, dep habarlaıdy QazAqparat.

«Analogtyq habar taratýdan birtindep tsıfrlyq habar taratýǵa kóshý jumysy belsendi júrgizilýde. Shalǵaı aýdandar turǵyndarynyń sapasy tómen 3-4 arnaǵa ǵana qoly jetimdi bolǵan kezder búgingi kúni artta qaldy. Qazir halyqtyń tsıfrlyq televızııamen jalpy  qamtylýy 77 protsentke  deıin jetti. Almaty, Jambyl, Mańǵystaý, Ońtústik Qazaqstan oblystarynda tsıfrlyq efır taratýdy engizý protsesi aıaqtaldy. Qalǵan oblystarda bul jumysty 2018 jyldyń sońyna deıin aıaqtaýdy kózdep otyrmyz», - dedi ol.

Mınıstr óz sózinde otandyq spýtnıktiń televızııa abonentteriniń sany 1 mln. 300 myńǵa jaqyndaǵanyn atap ótti.

«Bes jyl burynǵy kórsetkishpen salystyrsaq, qazir kórermenderimiz otandyq  spýtnıktik televızııaǵa basymdyq berip otyrǵandyǵyn senimmen aıtýǵa bolady. Sondaı-aq halyqaralyq  tájirıbe men oqyrmandardyń qalaýyn eskere otyryp, «Egemen Qazaqstan» jáne «Kazahstanskaıa pravda»  gazetterine redızaın júrgizildi. Qazir bul gazetter tolyq túrli-tústi formatta shyǵýda. Sonymen qatar olardyń saıttary da úlken jańǵyrtýdan ótip, yqpaldy  aqparat resýrsyna  aınaldy», - dedi Dáýren Abaev.