Aqparat mınıstri sý basqan aýmaqtarda jýrnalısterdiń jumysyn shekteý týraly pikir bildirdi

ASTANA. KAZINFORM – Mádenıet jáne aqparat mınıstri Aıda Balaeva Tótenshe jaǵdaı rejımi jarııalanǵan óńirlerde jýrnalısterdiń jumysyn shekteý týraly pikir bildirdi.

«Keshe ǵana tótenshe jaǵdaılar qyzmetiniń ókilderi bastapqyda evakýatsııadan bas tartqan adamdardy shuǵyl jaǵdaıda qutqarýǵa májbúr boldy. Árıne, biz birinshi kezekte adamdardyń qaýipsizdigi týraly aıtyp otyrǵandyqtan, olardyń quzyrynda zańnamalyq shekteý normalary bar. Onyń ishinde jýrnalıster de bar. Men sizderge qazir naqty aıta almaımyn. Óıtkeni biz Astanada otyrmyz. Ol jaqta qandaı jaǵdaı bolyp jatyr? Bálkim sizderdiń onda barýlaryńyzǵa bolmaıtyndaı ahýal bar shyǵar. Sondyqtan bári ornyqqannan keıin mán-jaıdy anyqtaıyq», - dedi ol Májilistiń jalpy otyrysynan keıin BAQ ókiliniń saýalyna bergen jaýabynda.

Jýrnalıst mundaı shekteý tsenzýranyń bir túri emes pe, degen saýal qoıdy.

«Qutqarý jumystary kezinde jumys istep júrgenińizde bireý batyp ketse, zardap shekse, kim jaýap beredi? Sondyqtan zańnamada bar tártipke baǵynaıyq. Men ony tsenzýra dep eseptemeımin, adamdardyń ómirine degen qamqorlyq dep esepteımin», - dedi Aıda Balaeva.

Osyǵan deıin BQO-da jýrnalısterdiń sý basqan aımaqtarǵa kirýine tyıym salynǵany týraly jazǵan edik.