Aqparat ǵasyrynda Qazaqstannyń birqatar aýdandary radıohabarmen qamtylmaı otyr - J. Erǵalıev
ASTANA. QazAqparat - Aqparat ǵasyrynda Qazaqstannyń birqatar aýdandary tól radıohabarmen qamtylmaı otyr Búgin Parlament Senatynyń jalpy otyrysynda senator Jabal Erǵalıev osy máseleni kóterdi.
Depýtattyń aıtýynsha, eldi aqparatpen qamtamasyz etýdiń máni men mańyzy arta túsip otyrǵan shaqta Aqmola oblysynyń Sandyqtaý aýdany 1996 jyldan beri radıohabarsyz qalyp otyr. Bul rette aýdan halqy elimizde bolyp jatqan jańalyqtardy, ishki jáne syrtqy saıasat máselelerinen beıhabar qalyp jatatyndyǵyn jáne tótenshe jaǵdaılarǵa jol bermeý maqsatynda arnaıy habar berýdiń ózi múmkin bolmaı otyrǵandyǵyn jetkizgen.
«Qazirgi ýaqytta Qazaqstannyń shekaralyq aımaqtarynyń eldi mekenderin de jergilikti radıohabarlarymen qamtamasyz etýdiń ózekti máselesine de nazar aýdarý qajet. Óıtkeni, Qazaqstannyń 129 eldi mekenderi Reseı Federatsııasynyń, 393 eldi mekenderi Ózbekstannyń, 35 eldi mekenderi Qyrǵyzstannyń, 24 eldi mekenderi Qytaıdyń radıohabarlarymen qamtylyp otyr. Sonymen birge memlekettik radıohabarlarymen, sonyń ishinde 29 aýdan ortalyqtary, 6 shaǵyn qalalar, 100 myńǵa tarta halqy bar 63 qala, árqaısysynda kem degende 5 myń halqy bar 6 879 aýyl «Qazaq radıosynyń», 112 aýdan ortalyǵy, 17 shaǵyn qala, 100 myńǵa tarta halqy bar 43 qala, árqaısysynda kem degende 5 myń halqy bar 4 937 aýyl «Shalqar» radıohabarlarymen múldem qamtylmaı qalyp otyr», - dedi J. Erǵalıev.
Osyǵan oraı, senator elimizdiń barlyq aýmaǵyn óz elimizdiń radıohabarlarymen qamtamasyz etý máselesine Úkimet tarapynan aıyryqsha kóńil bólýdi surady.
