Aqparat - bul demokratııa ottegisi, oǵan erkin qoljetimdilik - jemqorlyqqa qarsy daýa - QR Parlamenti Májilisiniń depýtaty
ASTANA. Maýsymnyń 22-si. QazAqparat /Marlan Jıembaı/ - Bizdiń zańnamanyń barlyq kóleminde aqparattyq-quqyqtyq keńistiktegi ahýaldy anyqtaıtyn júıe quraıtyn zańnamalyq aktilerdi biriktiretin zańnama joq.
Bul pikirdi búgin QR Parlamenti Májilisiniń depýtaty Jaqyp Asanov «Qazaqstanda «Aqparatqa qol jetimdilik týraly» Zańdy qabyldaý: shynaıy jaǵdaıy jáne bolashaǵy» atty taqyryppen ótip jatqan sarapshylar kezdesýi barysynda bildirdi.
«Qazirgi zamanǵy qazaqstandyq qoǵamda aqparat jalpyǵa qoljetimdi bolýy kerek degen turaqty pikir bar. Alaıda bizdiń zańnamanyń barlyq kóleminde aqparattyq-quqyqtyq keńistiktegi ahýaldy anyqtaıtyn júıe quraıtyn zańnamalyq aktilerdi biriktiretin zańnama joq. Memlekettik organdardyń aqparattyq ashyqtyǵy standarttary da joq», deıdi ol. Onyń atap ótýinshe, aqparattaǵy quqyqty retteıtin normalar ártúrli normatıvtik-quqyqtyq aktilerge bólinip ketken jáne bul quqyqtyq qatynastardy úzik-úzik qana retteıdi. Tipti bizdiń zańnamada aqparatqa qoljetimdilik degenimiz ne ekendigi týraly bazalyq túsinikten de ada. Bul problemany paıdalanyp, árbir memlekettik organ aqparatty berý nemese bermeý kerektigin, qandaı málimetter ashyq, qandaıy jabyq ekendikterin ózderi sheship otyr.
«Búgingi tańda óndirýshi men áleýmettik-mańyzdy aqparatty ustaýshylar jáne qatardaǵy azamattar qarym-qatynasynda teńsizdikti baıqaýǵa bolady», dep atap ótken depýtattyń sózine qaraǵanda azamattar, onyń ishinde kásipkerler de bul máselede suraýshy rólinde, al memlekettik organdar negizinen aqparat paıdalanýshyǵa ruqsat berý tártibin qoldanýshy bolýǵa tyrysýda. Bul kedergilerden ótý jolynda fızıkalyq, moraldyq, materıaldyq ári ýaqyt shyǵyndaýǵa týra keledi. «Budan jemqorlyq deńgeıi basqa da faktorlarmen qatar aqparattyq saladaǵy memleket saıasatyna da táýeldi degen qorytyndy shyǵarýǵa bolady. «Aqparat - bul demokratııa ottegisi, oǵan erkin qoljetimdilik - jemqorlyqqa qarsy daýa» dep tegin aıtpasa kerek», deıdi J.Asanov.
Depýtattyń paıymdaýynsha, adamdar bılik qyzmeti týraly tolyqqandy aqparat ala alatyn elderde jemqorlyq deńgeıi óte tómen, al adam quqyǵy men bostandyǵyn saqtaıtyn memleket jaýapkershilikti ári tıimdi jumys isteıdi. «Sondyqtan aqparatqa qoljetimdilik týraly zańdy qabyldaý qajettiligi pisip jetilip otyr jáne bul taqyryp birneshe jyldan beri memlekettik organdar, bıznes qaýymdastyqtar, ÚEU, sarapshylar jáne jýrnalıster arasynda talqylanýda. Olar árqashanda Qazaqstanǵa aqparatqa qoljetimdilik máselesi retteıtin zańnamalyq tetikter qajet degen pikirge keledi», deıdi J.Asanov.
