Aqparat alý quqyǵynyń jahandyq reıtıngisi: Qazaqstan 150-den 60 ball aldy

ASTANA. QazAqparat –Qazaqstan aqparat alý quqyǵynyń jahandyq reıtıngisinde múmkin bolǵan 150 baldan 60 ball jınaǵan. Bul týraly Aqparat jáne qoǵamdyq damý mınıstrliginiń eldegi aqparatqa qol jetkizý salasynyń jaı-kúıi týraly jyldyq esebinde aıtylǵan, dep habarlaıdy QazAqparat tilshisi.

«Memlekettik bılik organdarynyń qaramaǵyndaǵy aqparatqa qol jetkizý quqyǵyn iske asyrý úshin quqyqtyq bazanyń kúshin ólsheıtin aqparatqa quqyqtyń jahandyq reıtınginde (The Right to Information Rating) Qazaqstan 2022 jyly múmkin bolatyn 150-den 60 balǵa baǵalandy», - dep jazylǵan esepte.

Sondaı-aq qujatta keıingi 6 jyldaǵy kórsetkish berilgen. 2017 jyly elimiz bul reıtıngide 57 ball alsa, 2017-2021 jyldar aralyǵynda biryńǵaı 61 ball alyp otyrǵan. Al byltyr bir baly kemip – 60 bolǵan.

Aqparat jáne qoǵamdyq damý mınıstrligi osy jaıttardy eskerip, Qazaqstan zańmanasyn myna baǵyttarda jetildirýdi usynady:

- memlekettik organdardyń aqparatty ashyp kórsetpeýge qatysty problemany sheshetin táýelsiz qadaǵalaý organy men sanktsııalar júıesin qurý;

- halyqaralyq standarttarǵa sáıkes keletin aqparatqa qol jetkizý quqyǵynan erekshelikter tizbesin belgileý. Mysaly, ulttyq qaýipsizdik, halyqaralyq qatynastar, zańdy kommertsııalyq múddeler jáne t.b.;

- qoǵamdyq múddeniń mindetti basymdyǵyn belgileý;

- laýazymdy adamdarǵa arnalǵan oqytý baǵdarlamalaryn engizý jáne t.b.