Aqparat agenttikteriniń Kaspıı alıansy qurylady

MÁSKEÝ. KAZINFORM — Búgin Máskeýde Kaspıı aımaǵy elderiniń aqparat agenttikteri ókilderiniń kezdesýi ótti. 

Otyrysqa ÁZERTADJ aqparat agenttiginiń (Ázerbaıjan Respýblıkasy), IRNA aqparat agenttiginiń (Iran Islam Respýblıkasy), Qazaqstan Respýblıkasy Prezıdenti Teleradıokesheniniń, TASS aqparat agenttiginiń (Reseı Federatsııasy) jáne TDH aqparat agenttiginiń (Túrikmenstan) ókilderi qatysty.

Qatysýshylar Kaspıı mańynyń jetekshi BAQ-tary arasyndaǵy kópjaqty aqparattyq yntymaqtastyqty nyǵaıtýdyń mańyzyn túsine otyryp, Aqparat agenttikteriniń Kaspıı alıansyn qurýdyń oryndylyǵy týraly qorytyndyǵa keldi.

Qatysýshylar jumys tártibimen alıans erejesin ázirleý, kelesi otyrysty ótkizý ýaqyty men ornyn anyqtaý, sondaı-aq alıans aıasyndaǵy aqparattyq yntymaqtastyq formatyn ázirleý boıynsha konsýltatsııalar ótkizýge ýaǵdalasty.