Aqpannyń 15-16-synan bastap Qazaqstannyń barlyq aımaqtarynda aýa temperatýrasynyń kóterilýi kútilýde - Qazgıdromet
ASTANA. Aqpannyń 10-y. QazAqparat /Dımash Syzdyqov/ - Aqpannyń 15-16-synan bastap Qazaqstannyń ortalyǵy men shyǵysynda aıaz báseńdeıdi, al respýblıkanyń ońtústik jáne batys bólikterinde - aýanyń temperatýrasy kóteriledi.
Bul týraly búgin baspasóz máslıhatynda «Qazgıdromet» RMK jetekshi ınjeneri-sınoptık Tatıana Hýdıakova málim etti.
Onyń aıtýynsha, shyǵys jáne ortalyq Qazaqstandaǵy uzaqqa sozylǵan aıaz Arktıka alabynan kelgen belsendi jáne qýatty antıtsıklonmen, aýa aǵysymen baılanysty. «Eger ótken jyldary antıtsıklon jıi ózgerip, Altantıkadan jyly aýa aǵysynyń lebi Qazaqstan aýmaǵyna enip otyrdy. Al bıyl Arktıkadaǵy salqyndyq bizge atlantıkalyq jyly aýanyń enýine bóget jasady», - dedi T.Hýdıakova.
«Qazgıdromettiń aldyn ala málimetteri boıynsha, aqpannyń 15-16-synan bastap antıtsıklon buzylyp, shyǵysqa qaraı aýysady, sonyń nátıjesinde Qazaqstanǵa jyly aýa aǵysy kele bastaıdy. «Budan keıin qaıtadan antıtsılon bastalyp, salqyndyq túsýi múmkin», - dedi T.Hýdıakova.
Qazgıdromette atap ótkenindeı, eń tómengi temperatýra - 45 gradýsqa deıin - Shyǵys Qazaqstan aýmaǵynda saqtalady. Sondaı-aq Aqmola, Soltústik Qazaqstan, Pavlodar jáne Qaraǵandy oblystarynda aýa raıy tómendep tur.
Búgin Astanada eń tómengi temperatýra 33,6 gradýs boldy, 1969 jylǵy aqpannyń 10-ynda termometr baǵany 40 gradýsqa deıin tómendegen bolatyn. Qazaqstannyń jańa elordasy aýmaǵyndaǵy absolıýttik eń tómengi temperatýra 1893 jyly tirkeldi, onda aýanyń temperatýrasy mınýs 52 gradýsqa jetken bolatyn.
