Aqpannyń 14-ine deıingi málimetter boıynsha kezekten tys Prezıdent saılaýynda qatysý úshin 6 azamat ótinish berdi
ASTANA. 14 aqpan. QazAqparat /Aıdar Ospanalıev/ - Aqpannyń 14-ine deıin Ortalyq saılaý komıssııasyna ózderin Prezıdenttikke kandıdat etip tirkeý jóninde 6 adam ótinish berdi.
Ortalyq saılaý komıssııasynyń málimetteri boıynsha OSK-ǵa alǵashqylardyń biri bolyp ózin zańgermin dep tanystyrǵan Sálim Óten myrza ótinish bergen. Budan soń ekolog, ǵalym Musaǵalı Dýambekov Prezıdent bolýǵa nıetti ekendigin jetkizdi. Onyń izin ala, prezıdenttikke kandıdat retinde saıasatker, «Kenesary han» qoǵamdyq qorynyń prezıdenti Ýálıhan Qaısarov tirkeldi. Budan soń «Attan, Qazaqstan» qozǵalysynyń kóshbasshysy Amantaı-qajy Asylbek te el basqarýdan úmitti ekendigin aıtyp, OSK-ǵa ótinish túsirdi. «Nur Otan» halyqtyq - demokratııalyq partııasynyń XIII sezinen soń osy partııa atynan Prezıdenttikke kandıdat bolyp, Memleket basshysy Nursultan Nazarbaev tirkeldi. Prezıdenttiń izin ala altynshy kandıdat bolyp 1962 jyly týylǵan Astana turǵyny Qanat Esjanov tirkeldi. OSK-nyń málimetterinshe, atalmysh azamat jumyssyz.
Sonymen osy ýaqytqa deıin Ortalyq saılaý komıssııasyna kezekten tys Prezıdent saılaýyna qatysýǵa nıet bildirgen azamattar sany 6 adamdy qurady. Alaıda Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııaǵa emtıhandy tek Prezıdenttikke kandıdat Sálim Óten men Musaǵalı Dýambekov jáne Elbasy Nursultan Nazarbaev qana sátti tapsyra aldy. Al Ýálıhan Qaısarov komıssııanyń synyna tótep bere almady. Osyǵan baılanysty ol Prezıdenttikke kandıdat retinde tirkelý maqsatynda OSK-na ekinshi qaıtara qujat tapsyrdy. Alaıda OSK músheleri onyń ótinishin qaraýsyz qaldyrdy. Osylaısha atalmysh kandıdat saıası dodadan tys qaldy. Al Amantaı-qajy Asylbek aldyn ala eskertilgenine qaramastan aqpannyń 12-i kúni belgilengen lıngvıstıkalyq komıssııanyń otyrysyna kelmeı qaldy. Alaıda bul atalmysh kandıdattyń saılaýdan tys qalǵandyǵyn bildirmeıdi. Sebebi onyń emtıhan tapsyrýǵa áli ýaqyty bar. Sońǵy tirkelgen kandıdattyń emtıhan tapsyrý merzimi ázirge belgisiz. Osylaısha 3 sáýirge belgilengen kezekten tys Prezıdent saılaýynda básekege túsetin azamattar sany 5 adamdy qurap otyr.
