Aqpannan bastap motor maılary tańbalana bastaıdy
ASTANA. KAZINFORM — Energetıka mınıstrligi 2026 jylǵy aqpan aıynan bastap motor maılaryn mindetti tsıfrlyq tańbalaý engiziletini týraly habarlaıdy. Atalǵan shara «Tańbalaýǵa jatatyn taýarlar tizbesin aıqyndaý týraly» tıisti buıryqqa sáıkes júzege asyrylady.
Jańa quqyqtyq talaptarǵa ýaqtyly daıyndalý maqsatynda óndirýshilerge, ımporttaýshylarǵa, sondaı-aq kóterme jáne bólshek saýdamen aınalysatyn naryq qatysýshylaryna Taýarlardy tańbalaý jáne qadaǵalaý jónindegi aqparattyq júıede tirkeý rásiminen ótý qajettigi eskertiledi. Naryq qatysýshylary úshin aqparattyq júıege qoljetimdilik resmı veb-resýrsy arqyly qamtamasyz etildi.
Jańa retteý tetigin engizý kezeń-kezeńimen júzege asyrylatyn bolady. Aǵymdaǵy jyldyń aqpan aıynan bastap kórsetilgen merzimnen keıin óndirilgen nemese Qazaqstan Respýblıkasynyń aýmaǵyna ákelingen motor maılary mindetti tsıfrlyq tańbalaýǵa jatady. Al taýar qozǵalysyn jetkizý tizbeginiń barlyq kezeńinde tolyq qadaǵalaý rejımi 2027 jylǵy 1 aqpannan bastap engiziledi.
— Atalǵan jańashyldyqtyń negizgi maqsaty — naryqtaǵy ashyqtyqty arttyrý jáne tutynýshylardyń quqyqtaryn qorǵaý. Sarapshylardyń baǵalaýynsha, qazir satylyp jatqan motor maılarynyń edáýir bóligi kóleńkeli aınalymda bolýy múmkin. Josyqsyz jetkizýshiler kontrafaktilik ónimdi quıý kezinde tanymal brendterdiń túpnusqa qaptamasyn paıdalanyp, jalǵan ónimdi syrtqy belgileri boıynsha túpnusqadan ajyratý múmkin bolmaıtyndaı etip usynady. Mundaı sapasyz ónimdi paıdalaný avtokólik ıeleri úshin qozǵaltqyshtyń isten shyǵýyna jáne edáýir qarjylyq shyǵyndarǵa ákeletin qaýip tóndiredi, — dep túsindirdi vedomstvo.
Data Matrix sáıkestendirý quraldary arqyly tsıfrlyq tańbalaýdy engizý osy máselelerdi sheshýge baǵyttalǵan. Árbir kanıstrge kóshirip alý nemese qaıta paıdalaný múmkin bolmaıtyn biregeı tsıfrlyq kodtyń berilýi ónim aınalymyn tolyq baqylaýǵa múmkindik beredi. Atalǵan mehanızm árbir taýardyń — zaýyttan nemese shekaradan bastap dúken sóresine deıingi qozǵalysyn ashyq ári qadaǵalanýyn qamtamasyz etip, kontrafaktilik ónimdi satyp alý táýekelin azaıtady.
Budan buryn Qazaqstanda syra, motor maıy syndy ónimder tańbalanatynyn jazǵanbyz.