Aqpandaǵy bir qyzmetkerdiń ortasha ataýly aılyq jalaqysy 78083 teńgeni qurady - Statıstıka
ASTANA. 9 sáýir. QazAqparat - 2011 jylǵy aqpandaǵy bir qyzmetkerdiń ortasha ataýly aılyq jalaqysy 78083 teńgeni qurady jáne ótken jylǵy tıisti aımen salystyrǵanda 17,7,
naqty kóriniste 8,2 paıyzǵa ósti, dep habarlady QR Statıstıka agenttiginiń baspasóz qyzmetinen.
Vedomstvonyń atap ótýinshe, salalyq qurylymda jalaqynyń eń úlken mólsheri burynǵydaı qarjy jáne saqtandyrý qyzmetinde 167,3 myń teńge (ortasha respýblıkalyq deńgeıden 2,1 esege asady), kásibı, ǵylymı jáne tehnıkalyq qyzmetinde - 146,8 myń teńge (1,9 ese), ken óndirý ónerkásibi jáne karerlerdi qazýda 141,3 myń teńge (1,8 ese) kóleminde saqtalýda. Eń tómengi jalaqy aýyl, orman jáne balyq sharýashylyǵy qyzmetkerlerinde 33,3 myń teńge kóleminde. Bul respýblıka boıynsha kórsetkishten orta eseppen 57,4 paıyzǵa az.
Óńirlik bóliniste eń joǵary jalaqy Atyraý oblysynda - 155,71 myń teńge. Bul ortasha respýblıkalyq kórsetkishten 2 esege artyq. Soltústik Qazaqstan oblysynda munyń shamasy 52 myń teńgeni quraıdy ári respýblıkalyq ortasha deńgeıden 33,4 paıyzǵa tómen.
