Aqpanda Ulttyq qordan 400 mln AQSh dollary kóleminde valıýta satyldy — Ulttyq bank

ASTANA. KAZINFORM — Ulttyq qordan satý úlesi jalpy saýda-sattyq kóleminiń 6%-y boldy jáne kúnine 20 mln AQSh dollarynan asqan joq, dep habarlaıdy Ulttyq banktiń baspasóz qyzmeti.

Aqpan aıynyń qorytyndysy boıynsha teńge baǵamy 1 AQSh dollary úshin 497,69 teńgege deıin 0,7%-ǵa nyǵaıdy. Qazaqstan qor bırjasyndaǵy saýda-sattyqtyń ortasha bir kúndik kólemi bir aıda 306 mln AQSh dollarynan 335 mln AQSh dollaryna deıin ulǵaıdy. Saýda-sattyqtyń jalpy kólemi 6,7 mlrd AQSh dollaryn qurady.

— Aqpan aıynda Ulttyq qordan 400 mln AQSh dollarynda valıýta satyldy, bul óz kezeginde respýblıkalyq bıýdjetke transfert bólýdi qamtamasyz etýge múmkindik berdi. Ulttyq qordan satý úlesi jalpy saýda-sattyq kóleminiń 6%-y boldy jáne kúnine 20 mln AQSh dollarynan asqan joq. Kútiletin fıskaldyq túsimderdi eskergende, Úkimettiń aldyn ala boljamdy ótinimderi boıynsha naýryz aıynda respýblıkalyq bıýdjetke transfert bólýge Ulttyq bank Ulttyq qordan 400 mln AQSh dollarynan 500 mln AQSh dollaryna deıingi mólsherde valıýta satylady dep boljaıdy, — delingen bank málimdemesinde.

Aqpan aıynda «aınalaý» operatsııalary aıasynda 350 mlrd teńge alyndy. Naýryz aıynda osy maqsat úshin 350 mlrd teńge balamasynda valıýta satý kútiledi.

Ulttyq qordyń qarajatymen operatsııalar júrgizý kezinde, sondaı-aq «aınalaý» tetigin iske asyrý kezinde Ulttyq Bank naryqtyq beıtaraptyq qaǵıdatyn ustanady, bul shetel valıýtasyn turaqty jáne birkelki satýdy bildiredi.

— Ulttyq bank aqpanda valıýtalyq ınterventsııa júrgizgen joq. Ótken aıdyń qorytyndysy boıynsha kvazımemlekettik sektor sýbektilerinde valıýtalyq túsimniń bir bóligin mindetti túrde satý normasy aıasynda valıýta túsimin satý kólemi shamamen 284 mln AQSh dollaryn qurady. Osyǵan deıingi josparǵa sáıkes, BJZQ valıýtalyq aktıvteriniń úlesi 40%-dan asatynyn eskergende, Ulttyq bank aqpan aıynda zeınetaqy aktıvteriniń ınvestıtsııalyq portfeline AQSh dollaryn satyp almady. Naýryzda da valıýta satyp alýǵa qatysty jospar joq, — dep atap ótti UB baspasóz qyzmeti.

Ashyqtyq qaǵıdaty aıasynda Ulttyq bank valıýta naryǵynda júrgiziletin operatsııalar týraly aqparatty tolyq ashyp kórsetýdi jalǵastyrady. Qysqamerzimdi keleshekte teńgeniń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady. Ulttyq bank teńgerimsizdiktiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustana beredi.

Osyǵan deıin Ulttyq bank dollar baǵamynyń álsireý sebebin túsindirdi.