Aqpanda turaqtandyrý qorlarynan kókónister naryqqa shyǵaryla bastaıdy

ASTANA. KAZINFORM – Aqpanda turaqtandyrý qorlarynan kókónister naryqqa shyǵaryla bastaıdy. Bul týraly Úkimette ótip jatqan brıfıngte Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.

- Jańa jyldyq merekeler jaqyndaǵanyn eskere otyryp, múmkin bolatyn baǵa ósimin tejeý úshin qosymsha sharalar qabyldanyp jatyr. Óńirlerde turaqty aýyl sharýashylyǵy jármeńkeleri uıymdastyrylýda. Qysqy jáne maýsymaralyq kezeńde baǵany odan ary turaqtandyrý úshin aqpan aıynyń basynda turaqtandyrý qorlarynan kókónisterdi shyǵara bastaý josparlanyp otyr. Bul naryqty qajetti ónim kólemimen qamtamasyz etýge ári baǵa aýytqýynyń aldyn alýǵa múmkindik beredi, - dedi ol.

Vıtse-premerdiń aıtýynsha, óńirlik komıssııalardyń qyzmeti aıasynda baǵa ósimine taldaý júrgizilip jatyr. Ónimsiz deldaldar anyqtalyp, taýarlyq ústeme baǵanyń asyp ketý faktileri qaralýda.

- Bıyl atalǵan komıssııanyń fıkaldyq baqylaý jáne kúshtik organdardy tartý arqyly kúsheıtildi. Maýsymaralyq kezeńde ishki naryqty kókónistermen tolyqtyrý úshin jaqyn shetelden erte pisetin kókónisterdi jetkizý maqsatynda jasyl dáliz uıymdastyryldy. Saýda salasynda bıznespen ózara tyǵyz baılanysty júzege asyrylyp jatyr, - dedi Nurlan Baıbazarov.

Eske salsaq, buǵan deıin Ulttyq ekonomıka mınıstri Nurlan Baıbazarov teńgeniń álsireýiniń 3 faktoryn atady.