Aqpan aıynda jetisaılyq dıqandar 120 tonna qyryqqabat jınady
TÚRKІSTAN. QazAqparat – Túrkistan oblysynyń Jetisaı aýdanynda aǵymdaǵy jyly 900 gektarǵa qyryqqabat kóshetteri otyrǵyzylǵan. Jergilikti dıqandar aqpan aıynda 120 tonna qyryqqabatty jınap, saýdaǵa shyǵardy, dep habarlaıdy QazAqparat tilshisi.
Jalpy aýylsharýashylyǵy maqsatyndaǵy jer kólemi 78 500 gektardy quraıdy. Ótken jyly aýdanda 1 170 gektarǵa qyryqqabat egilip, odan 36 myń tonna ónim jınalǵan. Jańa dáýir eldi mekeninde ornalasqan «Shablan» sharýa qojalyǵy jyl saıyn kókónistiń osy túrin egýmen aınalysady. Bıyl qojalyq 3,5 gektarǵa qyryqqabat egip, qazirgi tańda odan 70 tonna jınap alǵan. Al, Nurbol Ámetov esimdi sharýa 50 tonna ónim jınaǵan.
Dıqandar alynǵan ónimderin jergilikti bazarlarǵa jáne respýblıkanyń ózge óńirlerine jóneltken. Odan bólek, byltyr aýdanda 65,5 mlrd teńge aýyl sharýashylyǵy ónimderi óndirilgen.
Atalǵan salaǵa ótken jyly 2 mlrd 600 mln teńgeniń ınvestıtsııasy tartylyp, 2019 jylmen salystyrǵanda atalǵan salaǵa tartylǵan ınvestıtsııa kólemi eki esege artqan.
Aıta keterligi, kúzgi jáne kóktemgi dala jumystaryn júrgizýge Úkimet tarapynan jeńildetilgen baǵada bólingen 9500 tonna janar-jaǵarmaı sharýalarǵa úlestirilgen.
