Aqpan aıynda elordada qansha adamǵa vaktsına salynatyny belgili boldy
NUR-SULTAN. QazAqparat – 1 aqpannan beri 5 adam koronavırýsqa qarsy vaktsınadan bas tartty. Bul týraly Ortalyq kommýnıkatsııalar qyzmetinde Nur-Sultan qalasynyń qoǵamdyq densaýlyq saqtaý basqarmasynyń basshysy Tımýr Muratov málim etti, dep habarlaıdy QazAqparat tilshisi.
«Aqpan aıynda 2030 doza vaktsına salynady dep josparlap otyrmyz. Qazirgi ýaqatta 719 adam vaktsınasyn (1-8 aqpan aralyǵynda) alyp úlgerdi. Qalǵany osy aıdyń ishinde ekpe saldyrady. Soǵan qosa, bul vaktsınanyń ekinshi komponentin de osy aıdyń sońynan bastap jasaıtyn bolamyz», - dedi T. Muratov Ortalyq kommýnıkatsııalar qyzmetinde.
Sonymen qatar ol vaktsına alǵan adamdardyń arasynda aıtarlyqtaı keri reaktsııa bolmaǵanyn jetkizdi.
«Vaktsına salǵan orynnyń aýyrýy jáne keshke taman adamnyń sál álsireýin keri reaktsııa dep aıtýǵa bolmaıdy. Vaktsına alǵan adam úshin ol qalypty jaǵdaı. Men ózim vaktsına aldym, birinshi kúnniń keshinde sondaı kóńil-kúıde boldym. Ekinshi kúni bul kúı ózdiginen ketip qaldy», dep túsindirdi basqarma basshysy.
T. Muratov vaktsınadan óz erkimen bas tartqan medıtsına qyzmetkerleri týraly aıtty.
«Vaktsına saldyrýdan bas tartqan azamattar bar dep aıtyp otyrmyz. Olardyń ishinde medıtsına qyzmetkerlerine ekpe saldyryp jatyrmyz. Ózderińiz kórip otyrǵandaı, jospar boıynsha myńnan asa adamǵa jasaý kerek edi (1-8 aqpan aralyǵynda vaktsııanalaýǵa 916 adam), sonyń ishinde 719-yna jasap úlgerdik. Óz erkimen bas tartqandar 5 adam ǵana. Olar óziniń oıymen, túsinigimen ázirshe vaktsına almaımyz dep sheshti. Qalǵan vaktsına saldyrmaǵan adamdarǵa toqtalsaq, olarǵa medıtsınalyq qarsy kórsetilimi boıynsha qoıylmady», - dedi ol.
Budan buryn habarlanǵandaı, elordanyń Qoǵamdyq densaýlyq saqtaý basqarmasynyń qoımasynda KVI-ǵa qarsy vaktsınanyń 1 531 dozasy bar.
