Aqpan aıynda elimizde elektr energııasyn óndirý qunynyń kóterilýi kútilmeıdi - KAZENERGY
ASTANA. QazAqparat - «KAZENERGY» munaı-gaz jáne energetıkalyq keshendi uıymdar qaýymdastyǵy Qazaqstanda elektr energııasynyń qunynyń ósýi týraly máseleniń keńinen talqylanýyna baılanysty jaryq tarıfteriniń qalaı qalyptasatynyn túsindirdi.
Elektr energııasyn «KEGOC» AQ ulttyq deńgeıdegi elektr jelileri jáne AEJK-nyń aımaqtyq jáne jergilikti deńgeılerdegi elektr jelileri boıynsha berilip, bólistirilýin memlekettik organ - QR Ulttyq ekonomıka mınıstrliginiń Tabıǵı monopolııalardy retteý jónindegi komıteti bekitedi.
«Jıyntyq tarıf onyń óndirilý qunyna, aımaqtyq jáne aımaqaralyq deńgeıdegi jelileri boıynsha berilýine jáne bólistirilýine, sondaı-aq jabdyqtaý ústemesine baılanysty qalyptasady. Osylaısha, tutynýshylar elektr energııasyn óndirýshiden sońǵy tutynýshyǵa deıin jetkizýdiń búkil protsesin uıymdastyratyn energııamen qamtamasyz etetin kásiporynǵa elektr energııasy úshin tıisti tólem tóleıdi», - delingen habarlamada. Elektr energııasynyń óndiristik qunyn memleket retteıdi. Atap aıtqanda, QR Úkimetiniń 2009 jylǵy 25 naýryzyndaǵy № 392 Qaýlysyna sáıkes, 2009-2015 jyldar aralyǵynda jyl saıyn elektr energııasynyń shekti tarıfteri «ınvestıtsııaǵa almastyrylatyn tarıf» qaǵıdaty boıynsha bekitildi. Osylaısha, elektr energııasynyń qunyna elektrmen jabdyqtaý júıelerin (jańa aktıvterdi qurý, qoldanystaǵy elektr stansalaryn keńeıtý, jańartý, qoldaý, qalpyna keltirý jáne tehnıkalyq qaıta jabdyqtaý) odan ári jańǵyrtý somasy da kiristiriledi. Ótken jyly QR Energetıka mınıstrligi energııa óndiretin uıymdarmen (EÓU) ınvestıtsııalyq kelisimderdi qarastyryp, qol qoıdy. Bul kelisimder EÓU úshin 2015 jyly QR Úkimetiniń 2009 jylǵy 25 naýryzyndaǵy №392 Qaýlysymen bekitilgen shekti tarıfterden aspaıtyn deńgeıde tarıfterdi bekitýdi kózdeıdi.
Osylaısha, elektr energııasyn óndirý qunynyń aǵymdaǵy deńgeıi 2009 jyly bekitilgen, Qazaqstanda 2015 jyldyń aqpan aıynan bastap elektr energııasy qunyn qosymsha ósirý qarastyrylmaıdy.
