Aqpan aıynyń basynan beri 10 mıllıonǵa jýyq syra quıylǵan keg tańbalandy – Saýda mınıstrligi
ASTANA. KAZINFORM - 2026 jylǵy 1 aqpannan bastap Qazaqstanda kegterde ótkiziletin syra men syra sýsyndaryn mindetti tsıfrlyq tańbalaý engizildi. Mindetti tańbalaý engizilgennen beri júıede 10 mıllıonǵa jýyq keg tańbalandy, dep habarlaıdy QR Saýda ján ıntegratsııa mınıstrliginiń baspasóz qyzmeti.
Kegterdiń standartty kólemi 30 jáne 50 lıtrdi quraıdy. Osyny eskere otyryp, tańbalanǵan syranyń jalpy kólemi shamamen 400 mıllıon lıtr bolady. Búginde tańbalaý júıesinde syra men syra sýsyndarynyń aınalymyna qatysatyn 10,8 myńnan astam qatysýshy tirkelgen.
Kegterde ótkiziletin barlyq syra men syra sýsyndary bólshek saýda núktelerine tańbalaý kodtary qoıylǵan kúıde jetkizilýi tıis. Barlyq bólshek saýda sýbektileri Taýarlardy tańbalaý jáne qadaǵalaý aqparattyq júıesinde (TTQ AJ) tirkelýi qajet. Ónimdi baqylaý-kassalyq mashınalar arqyly satý kezinde qaptamaǵa engizilgen Data Matrix kodyn skanerleý qajet. Satý kezinde kodty skanerleý ónimniń tańbalaý júıesindegi aınalymnan avtomatty túrde shyǵarylýyn qamtamasyz etedi.
Quıylyp satylatyn tańbalanǵan syra men syra sýsyndaryn aınalymnan shyǵarý fıskaldyq derekter operatorynan (FDO) kelip túsken alǵashqy málimetter negizinde júzege asyrylady. Bul rette aınalymnan shyǵarý búkil kegke qatysty tirkeledi.
Esterińizge sala keteıik, syra men syra sýsyndaryn tańbalaý kezeń-kezeńimen engizilip keledi. 2026 jylǵy 1 aqpannan bastap mindetti tańbalaý kegterdegi ónimderge qatysty qoldanylady. 2026 jylǵy qyrkúıekten bastap tańbalaý shyny bótelkedegi syra úshin, al 2027 jylǵy qańtardan bastap qańyltyr bankalardaǵy ónim úshin mindetti bolady.
Kezeń-kezeńimen engizý naryq qatysýshylaryna jabdyqtar men esepke alý júıelerin birtindep beıimdeýge, óndiristik jáne logıstıkalyq úderisterdi retteýge, sondaı-aq ónim jetkizilimderinde irkilisterge jol bermeı, tańbalaý júıesiniń turaqty jumysyn qamtamasyz etýge múmkindik beredi.
Qazirgi ýaqytta mindetti tsıfrlyq tańbalaý dárilik zattarǵa, aıaq kıim ónimderine jáne temeki buıymdaryna qatysty qoldanylady. 2025 jylǵy 1 jeltoqsannan bastap kıik múıizderi mindetti tańbalaýǵa jatady. 2026 jylǵy 1 aqpannan bastap syra men syra sýsyndaryna, sondaı-aq «Motor maılary» taýar tobyna qatysty tsıfrlyq tańbalaý mindetti boldy.
Osyǵan deıin Qazaqstanda syrany tańbalaý júıesi qalaı iske asatyny týraly jazdyq.
