Aqpan aıynda zeınetaqy qorynan 400-500 mln dollar alamyz – Ulttyq bank

ASTANA. KAZINFORM – Úkimet otyrysynda Ulttyq bank basqarma tóraǵasynyń orynbasary Aqyljan Baımaǵambetov zeınetaqy qorynyń aqshasyna valıýta satyp alý kólemi ulǵaıatynyn aıtty.

«Jyl basynan beri Ulttyq qordan respýblıkalyq bıýdjetke transfertterdi qamtamasyz etý úshin valıýta satý teńgege edáýir qoldaý kórsetti. Onyń kólemi 1 mlrd-tan astam dollar boldy. Ulttyq qordan valıýta satý kóleminiń ósýine jáne satý kóleminiń teńge baǵamynyń konıýnktýrasyna áser etýine baılanysty salymshylar múddesi úshin Biryńǵaı jınaqtaýshy zeınetaqy qorynyń zeınetaqy aktıvterin ınvestıtsııalaýǵa belsendi túrde valıýta satyp alý týraly sheshim qabyldandy. Osyǵan oraı, aqpan aıynda Biryńǵaı jınaqtaýshy zeınetaqy qoryna valıýta satyp alý kólemi 200 mln dollardan 400-500 mln dollarǵa deıin ulǵaıdy», - dedi Ulttyq bank basshysynyń orynbasary.

Onyń sózinshe, Ulttyq bank ıkemdi baǵam belgileý rejımin ustanýdy jalǵastyrady jáne valıýtalyq ınterventsııalar júrgizbeıdi.

«Qańtar aıynda jyldyq ınflıatsııa 9,5% deıin baıaýlady. 2023 jyldyń qorytyndysy boıynsha, ınflıatsııanyń tómendeýi bıylǵy qańtar aıynda bazalyq stavkany tómendetýge múmkindik berdi. Ol qańtarda 50 bazalyq tarmaqqa 15,25% deıin tómendetildi. Al jyldyq ınflıatsııanyń tómendeý qarqyny baıaýlap keledi. Qańtar aıyndaǵy aılyq ınflıatsııa aldyńǵy ortasha mánderden joǵary qalyptasty. Qalyptasqan ınflıatsııalyq ahýal dezınflıatsııalyq saıasattyń jalǵasýyn talap etedi», - dedi Aqyljan Baımaǵambetov.