Aqpan aıynda Pavlodarda ań aýlaǵandardy polıtsııa tekseredi
PAVLODAR. KAZINFORM - Óńirde erteńgi kúnnen «Brakoner» jedel-profılaktıkalyq is-sharasy bastalady. Janýarlar álemine zańsyz túrde zııan keltirgenderdi jaza kútip tur.
«Pavlodar oblysynyń aýmaǵynda brakonerlik, bıologııalyq resýrstar obektileriniń zańsyz aınalymy faktilerin anyqtaý jáne jolyn kesý maqsatynda 1-29 aqpan aralyǵynda «Brakoner»jedel-profılaktıkalyq júrgiziledi. Profılaktıkalyq is-shara barysynda polıtseıler ózge organdardyń ókilderimen birlesip, ańshylar jáne ańshylyq sharýashylyqtary men alqaptar aýmaqtaryndaǵy ań aýlaý jáne brakonerlik qaǵıdalaryn buzý faktilerin tekseredi», - dep habarlady óńirlik polıtsııa departamentinen.
Buǵan qosa ań aýlaý maqsatynda elimizge kelgen sheteldikterge qatysty ańshylyq qarýdy ákelý men áketý jáne kóshi-qon zańnamasy tártibiniń talaptaryn saqtaý bóliginde anyqtaýlar júrgiziledi. Avtojoldarda kúdikke ilingen kólik quraldary toqtatylyp, ańshylyq qarýy men patrondar, sýyq qarýdy saqtaýǵa jáne alyp júrýge ruqsat qujattary da nazarǵa alynady. Ań aýlaý, balyq aýlaý, aǵash kesý, aǵash daıyndaý jáne tabıǵatty paıdalanýdyń basqa da túrlerine, sondaı-aq bıologııalyq resýrstardyń barlyq túriniń obektileri men ónimderin tasymaldaýǵa ruqsat berý qujattarynyń bolýy da tekseriledi.
