Aqpan aıynda kún raıy qandaı bolady – sınoptıkter boljamy
ASTANA. KAZINFORM – «Qazgıdromet» RMK 2024 jyldyń aqpan aıynda elimizdegi kún raıyna boljamyn usyndy.
2024 jyldyń aqpan aıyna arnalǵan aýa raıy boljamyna sáıkes, respýblıkanyń basym bóliginde aýanyń ortasha temperatýrasy normadan 1-2° joǵary, Shyǵys Qazaqstan oblysynda, Almaty jáne Jetisý oblystarynyń ońtústik-shyǵys bóliginde, Túrkistan, Jambyl jáne Abaı oblystarynyń taýly, taý bókterindegi aımaqtarynda normaǵa jaqyn bolady.
Aqpan aıynda respýblıkanyń basym bóliginde jaýyn-shashyn mólsheri klımattyq norma shamasynda bolatyny boljanǵan. Atyraý oblysynda, Qostanaı oblysynyń soltústik bóliginde, elimizdiń ońtústigi men ońtústik-shyǵysyndaǵy taýly jáne taý bókterindegi aımaqtarda jaýyn-shashyn mólsheri normadan joǵary bolady. Respýblıkanyń soltústiginde negizinen qar jaýady, eldiń ońtústik-batysynda jáne ońtústiginde jańbyr jaýady. Eldiń soltústik jartysynda tuman túsip, kóktaıǵaq bolady, jel kúsheıip, burqasyn bolady.
Boljam boıynsha, aqpan aıynyń birinshi onkúndiginiń basynda Qazaqstannyń basym bóliginde qar jaýyp, burqasyn bolady, al ortasynda jáne sońynda jaýyn-shashyn (jańbyr, qar) túsedi.
Aqpannyń basynda respýblıkanyń ońtústik oblystarynyń taýly aımaqtarynda keı kezderi qalyń qar jaýady, tuman túsip, kún sýytady, jeldiń jyldamdyǵy 15-28 m/s deıin kúsheıedi.
Aqpan aıynyń birinshi onkúndiginiń basynda batysta, al onkúndiktiń ortasynda Qazaqstannyń basym bóliginde aýa temperatýrasynyń joǵarylaýy boljanyp otyr: soltústik bóliginde temperatýra -3+2°C-ge deıin, ońtústikte +5+15°C-ge deıin kóteriledi. Aqpan aıynyń birinshi onkúndiginiń sońynda elimizdiń soltústik-batys jartysynda, keıin qalǵan bóliginde temperatýralyq fonnyń tómendeýi boljandy.
