Aqpan aıynda qazaq sportshylary qansha lıtsenzııalyq jarysqa qatysady

ASTANA. KAZINFORM – Qazaq sportshylaryn osy aıda Parıj Olımpıadasyna joldamalar sarapqa salynatyn 17 iri doda kútip tur.

QR Sportty damytý dırektsııasy málim etkendeı, aqpanda Ulttyq qurama sportshylary sporttyń 18 túri boıynsha lıtsenzııa úlestiriletin 17 jarysta óner kórsetedi.

Atap aıtsaq, dzıýdo, semserlesý, sporttyq gımnastıka, aýyr atletıka jáne batýttaǵy gımnastıka boıynsha synǵa túsetin sportshylar Parıj Olımpıadasynyń joldamasyna reıtıngtik upaı beretin jarystarǵa qatysý arqyly talasady. Al, sý sporty túrleri, boks, jeńil atletıka ókilderi tórtjyldyqtyń basty jarysyna irikteý týrnırleri arqyly tikeleı joldamaǵa qol jetkizýge kúsh salady.

Aıta keteıik, dál búgingi kúnge deıin Qazaqstan delegatsııasynyń qorjynynda Parıj Olımpıadasynyń 8 sport túrinen 19 lıtsenzııasy bar (sadaq atý – 4, tas joldaǵy velosport – 3, nysana kózdeý – 5, qazirgi bessaıys – 2, boks – 2, grek-rım kúresi – 1, erkin kúres – 1, sporttyq gımnastıka – 1).

Olımpııa oıyndaryna deıin barlyǵy 69 lıtsenzııalyq jarys qaldy. Onyń ishinde 5 álem chempıonaty, 7 Azııa chempıonaty men 57 reıtıngtik týrnır bar.

«Bıyldyń basty oqıǵasy dep 26 shilde men 11 tamyz aralyǵynda Parıjde ótetin jazǵy Olımpııa oıyndaryn aıtýǵa bolady. Ár tórt jylda bir ret ótkiziletin dodaǵa álemniń 205 elinen 10 myńnan astam sportshy qatysady dep josparlanǵan. Parıjdegi básekede 32 sport túrinen 329 medal jıyntyǵy sarapqa salynady. Qazaqstan ulttyq quramasy sporttyń 20 túrinen qatysýdy josparlap otyr. Sondyqtan qazirgi tańda basty maqsat – qysqa merzimde meıilinshe kóp lıtsenzııa alý. Qurama kóshbasshylary ár sport túriniń ereksheligi, sportshynyń qajettiligi, medıtsınalyq-bıologııalyq turǵyda qamtamasyz etilgeni, onyń ishinde fızıoterapııa, ońaltý men jaraqattardyń aldyn alý, psıhologııalyq qoldaý jáne jarysqa daıyndyq kezinde kúızelisti jeńý sııaqty jaǵdaılar eskerilgen jeke jospar boıynsha daıyndalady», - dedi Týrızm jáne sport mınıstri Ermek Marjyqpaev.