Aqpan aıynda Elektrondyq eńbek bırjasynda 99 myń bos jumys orny jarııalandy
ASTANA. KAZINFORM – 2026 jylǵy aqpanda Enbek.kz Elektrondyq eńbek bırjasynda jumys berýshiler 99 myń bos jumys ornyn jarııalady, al jumys izdeýshiler 124,9 myń túıindeme ornalastyrdy. Qańtar aıymen salystyrǵanda bos jumys oryndarynyń sany 3,7%-ǵa (-3,7 myń) azaıdy. Al jarııalanǵan túıindemeler sany budan da aıtarlyqtaı – 23,1% (-37,5 myń) qysqardy.
Eńbek jáne halyqty áleýmettik qorǵaý mınıstrligi málimetinshe, salalyq qurylymda suranystyń eń úlken bóligi dástúrli túrde áleýmettik sala men qyzmet kórsetý sektoryna tıesili. Kósh bastap turǵan – bilim berý salasy, munda 26,9 myń bos jumys orny jarııalanǵan. Sondaı-aq ózge de qyzmet túrlerine – 14,6 myń, densaýlyq saqtaý jáne halyqqa áleýmettik qyzmet kórsetý salasynda – 9,4 myń, sondaı-aq óńdeý ónerkásibinde – 8,6 myń bos jumys ornyna eleýli suranys baıqalady. Jalpy alǵanda, osy baǵyttar eńbek kúshine degen suranystyń negizgi bóligin qalyptastyrady.
Bos jumys oryndarynyń biliktilik qurylymynda orta biliktilikti talap etetin jumys oryndary basym – olar barlyq vakansııanyń 44,2%-y. Joǵary bilikti mamandarǵa arnalǵan jumys oryndarynyń úlesi 34,4% bolsa, biliktilikti talap etpeıtin eńbekke suranys 21,4%-ǵa jetedi.
Óńirlik bóliniste eń kóp bos jumys orny Pavlodar oblysynda – 8,1 myń, Astana qalasynda – 7,8 myń, Túrkistan oblysynda – 7,4 myń, Qaraǵandy oblysynda – 6,6 myń jáne Almaty qalasynda – 6,3 myń vakansııa tirkeldi.
Eńbek usynysy jaǵynan jumys izdeýde Túrkistan oblysynyń turǵyndary belsendilik tanytty: 16,8 myń túıindeme (13,4%). Sondaı-aq Astana qalasynda – 10,2 myń (8,2%), Almaty oblysynda – 9,5 myń (7,6%) jáne Almaty qalasynda 9,2 myń (7,4%) túıindeme jarııalandy.
Jas qurylymynda jumys izdeýshilerdiń eń belsendi toby – 35 jasqa deıingi jastar, olardyń úlesine barlyq túıindemeniń 42,3%-y tıesili. 35–44 jas aralyǵyndaǵy úmitkerler – 26,7%, 45–54 jas aralyǵyndaǵylar – 19,8%, al 55 jastan asqandar – 11,2%.
Genderlik qurylymda áıelderdiń úlesi birshama basym: olar barlyq túıindemeniń 54,6%-y, al erlerdiń úlesi – 45,4%.
Biliktilik deńgeıi boıynsha jumys izdeýshiler arasynda orta bilimdi mamandar barlyq túıindemeniń 41%-y. Joǵary bilikti mamandar shamamen 31%-dy qurasa, biliktiligi joq jumysshylardyń úlesi 28%-ǵa jetedi.
Aqpan aıynda jumys berýshiler usynǵan eń joǵary jalaqy munaı jáne gaz ken oryndaryn ıgerý jónindegi ınjener-ázirleýshi laýazymynda (shamamen 3,6 mln teńge), qurylys salasyndaǵy jobanyń bas tehnology (shamamen 2,8 mln teńge), sondaı-aq materıaltaný tehnıgi (shamamen 2,2 mln teńge) boıynsha tirkeldi.
Jumys izdeýshiler tarapynan eń joǵary jalaqy kútilimderi ushqyshtarda (shamamen 3,3 mln teńge), ınvestıtsııalyq jobalar jónindegi dırektorlarda (shamamen 2,1 mln teńge), sondaı-aq oqý kýrstaryn ázirleýshilerde (shamamen 2 mln teńge) baıqaldy.
Jalpy alǵanda, aqpan aıynda Enbek.kz Elektrondyq eńbek bırjasyndaǵy eńbek naryǵy jyl basymen salystyrǵanda belsendiliktiń birshama tómendeýimen sıpattaldy. Degenmen suranys qurylymy turaqty: jumys berýshilerdiń negizgi qajettiligi áleýmettik salada, qyzmet kórsetý sektorynda jáne jumysshy mamandyqtarynda shoǵyrlanǵan. Al eńbek usynysy jaǵynan eldiń ońtústik óńirlerinen kelgen jumys izdeýshiler men jastardyń joǵary belsendiligi saqtalyp otyr.
Buǵan deıin elektrondyq eńbek bırjasynda 60 myńǵa jýyq bos jumys orny bar ekenin jazǵan bolatynbyz.
