Aqpan aıynda aýa raıy qandaı bolady

ASTANA. KAZINFORM – Konsýltatıvtik sınoptıkalyq boljamǵa sáıkes, 2026 jylǵy aqpan aıy jylyraq bolyp, jaýyn-shashyn mólsheri ortasha deńgeıde bolady.

Elimizdiń basym bóliginde aýanyń ortasha temperatýrasy klımattyq normadan 1–2° joǵary, al ońtústik-shyǵysynda normaǵa jýyq bolady.

Jaýyn-shashyn respýblıkanyń kóp bóliginde klımattyq norma shamasynda, al soltústik-batys bóliginde, ońtústik, ońtústik-shyǵys jáne shyǵys aımaqtardyń taýly jáne taý bókteri óńirlerinde normadan kóp bolýy múmkin.

Birinshi onkúndikte temperatýralyq fon:

Respýblıkanyń batysynda, soltústik-batysynda (Aqtóbe oblysy) túnde aýa temperatýrasy 23–28° aıazǵa deıin tómendeıdi, kúndiz 15–23° aıaz bolady. Onkúndiktiń sońynda aıaz báseńdep, túnde 10–20° aıaz, kúndiz 0…-8° aıaz bolady.

Eldiń soltústiginde, ortalyǵynda jáne shyǵysynda túngi temperatýra qysqa ýaqytqa 15–25° aıazdan 2–10° aıazǵa deıin joǵarylaıdy, kúndiz 5–13° aıazdan +4…-1° aralyǵyna deıin jylynady. Onkúndiktiń sońynda temperatýra qaıta tómendep, túnde 18–28° aıazǵa, kúndiz 13–20° aıazǵa deıin jetedi.

Ońtústik-batysta, ońtústikte jáne ońtústik-shyǵysta túngi temperatýra 5° aıazdan +5° jylyǵa deıin, keıin 3–11° aıazǵa deıin aýytqıdy (Qyzylorda oblysynyń soltústiginde 18° aıazǵa deıin).

Kúndiz temperatýra +3…+10°-tan +8…+17°-qa deıin kóteriledi, keıin 0…+8°-qa deıin tómendeıdi.

Jalpy aqpan aıynda batysta, soltústikte, ortalyqta jáne shyǵysta eń qatty aıaz birinshi jáne ekinshi onkúndikterde bolady: túnde 21–30° aıazǵa deıin, shyǵystyń taýly aımaqtarynda 35° aıazǵa deıin, kúndiz 13–20° aıaz bolady.

Birinshi onkúndiktiń ortasynda (batysta – basynda), sondaı-aq ekinshi jáne úshinshi onkúndikterdiń jekelegen kúnderinde kúndiz jylymyq bolýy múmkin.

Respýblıkanyń ońtústik jartysynda aqpan boıy túngi temperatýra 5° aıazdan +5° jylyǵa deıin, keıde 3–15° aıazǵa deıin aýytqıdy, kúndiz 0…+10°-tan +8…+17°-qa deıin bolady.

Respýblıkanyń soltústik bóliginde jaýyn-shashyn negizinen qar túrinde, al ońtústik-batysta jáne ońtústik óńirlerde jańbyr men dymqyl qar túrinde túsedi. Tuman, kóktaıǵaq, jeldiń kúsheıýi, soltústikte boran kútiledi. 

Aıta ketelik 2 aqpanda respýblıkalyq mańyzy bar joldardaǵy ahýal qandaı ekenin jazǵan edik.