Aqpan aıynda Aqtóbede 2-3 ese kóp qar jaýdy
AQTÓBE. KAZINFORM – Aqpan aıynda Aqtóbede ádettegiden 2-3 ese kóp qar jaýyp, kommýnaldyq mekeme úzdiksiz jumys istep jatyr. Sınoptıkter 2 naýryzǵa deıin boljam jasap, áli de jaýyn-shashyndy bolatynyn aıtyp otyr.
Aqtóbe oblysynda kommýnaldyq mekeme qyzmetkerleri kúsheıtilgen tártipte jumys istep jatyr.
- Qazir 350-den astam arnaıy tehnıka, 300-den astam jumysshy qalany qardan tazalap jatyr. Eń aldymen ortalyq kósheler men aýrýhana, mektepke barar jol, qoǵamdyq kólik qatynasyna jaǵdaı jasaldy. Sonymen birge turǵyn alaptarda jumys istelip jatyr, - dedi Aqtóbe qalalyq turǵyn úı-kommýnaldyq sharýashylyq bóliminiń bas mamany Ádilbek Ahmet.
Sınoptıkterdiń boljamy boıynsha 25-28 aqpan kúnderi aralyǵynda túnde qar jaýady. Keı jerlerde boran bolady.
- Birneshe tsıklon ótti. Aldymen kún jylyp, keıin kúrt salqyndap ketti. Áli de tsıklon jalǵasady. Oblysta, aýdandarda qar jaýady. Oblystyń ońtústik-shyǵysy, shyǵysyndaǵy Yrǵyz, Áıteke bı aýdandarynda, erteń soltústik aýdandarda qar jaýady dep boljap otyrmyz. Boljam boıynsha 2 naýryzǵa deıin qar jaýady. Aqtóbe qalasy emes, oblysta. Naýryzda da jaýyn-shashyn normadan kóp bolady. Degenmen naýryzda kún jylynady. Jylyný ekinshi onkúndikten bastalady, - dedi «Qazgıdromet» RMK Aqtóbe oblystyq fılıalynyń dırektory Aıgúl Saımova.
Aqtóbe oblystyq TJD baspasóz qyzmetiniń habarlaýynsha, 21-23 aqpan aralyǵynda respýblıkalyq jáne oblystyq mańyzdaǵy joldarda TJD jáne 20982 áskerı bóliminiń qyzmetkerleri 31 avarııalyq-qutqarý, 4 izdestirý-qutqarý jumystaryn istedi. Nátıjesinde 28 adam qutqarylyp, 63 adam evakýatsııalandy. Barlyǵy 14 júk jáne 21 jeńil avtokólik qar qursaýynan shyǵaryldy. Aqtóbe qalasy jáne Alǵa, Áıteke bı, Baıǵanın, Muǵaljar, Temir, Qobda, Hromtaý aýdandarynda 12 jylytý pýnki iske qosylyp, azamattar azyq-túlikpen qamtamasyz etildi.
- Oıyl aýdany Kósembaı aýylynda aıaǵy aýyr kelinshektiń tolǵaǵy kelip, Saraljyn aýylyna jetkizildi. Keıin Oıyl aýdandyq perzenthanasyna ákeldi. Al Mártók aýdanynda demikpe dertine shaldyqqan bala aýrýhanaǵa jetkizildi, - dedi Aqtóbe oblystyq TJD basqarma basshysy Aslan Arzymbetov.
Eske salsaq, Aqtóbe qalasy men 6 aýdanda tótenshe jaǵdaı rejımi áli saqtaýly. Qazirgi kezde oblys bıylǵy kóktemgi sý tasqyny kezeńine daıyndalyp jatyr.