Aqpan aıy qıyn bolmaq: AShM sharýalarǵa úndeý joldady

ASTANA. KAZINFORM – Aýyl sharýashylyǵy mınıstrligi aqpan aıynda kúnniń kúrt sýý boljamyna baılanysty sharýalarǵa úndeý jarııalady.

- Aýa raıyna nazar aýdarýdy jáne shalǵaıdaǵy maldyń qystaýyn qamtamasyz etý úshin qajetti sharalar qabyldaýdy suraımyz. Aqpan aıy mal ósirýshiler úshin qıyn bolmaq. «Qazgıdromet» derekterine sáıkes, Qazaqstannyń basym bóliginde ortasha aýa temperatýrasy -10 -16°S-ǵa deıin tómendemek. Al Atyraý, Qyzylorda, Jambyl, Almaty, Jetisý oblystarynda, Batys Qazaqstan, Mańǵystaý, Aqtóbe oblystarynyń ońtústik-batysynda jáne Túrkistan oblysynyń soltústik jartysynda -1 -9°S bolady dep kútilýde.

Sonymen qatar Mańǵystaý oblysynyń ońtústik-batysynda, Túrkistan oblysynyń ońtústiginde 0, +3°S-ge tómendeýi kútilýde, - delingen mınıstrlik taratqan habarlamada. 

Aqparatta aıtylǵandaı, aqpan aıynda elimizdiń basym bóliginde jaýyn–shashyn mólsheri normadan joǵary bolady. 

Onyń ishinde Mańǵystaý jáne Túrkistan oblystarynyń basym bóliginde, Atyraý, Aqtóbe, Qostanaıdyń soltústiginde, Soltústik-Qazaqstannyń soltústik-batysynda, Ulytaý oblysynyń ońtústik-batysynda, Qyzylorda oblysynyń soltústik jartysynda, Jambyl oblysynyń ońtústik-batys jartysynda normaǵa jaqyn bolady.

- Osyǵan baılanysty maldy jyly jáne qurǵaq qorada ustaý kerektigin suraımyz. Jemshóp mólsherin kóbeıtińiz, óıtkeni sýyqta janýarlar dene temperatýrasyn ustap turý úshin kóp energııany qajet etedi. Jemshóp qoryn tekserińiz, kún raıynyń kúrt ózgerýi jemniń qoljetimdiligi men sapasyna áser etýi múmkin. Bulaqtyń qatyp qalýyn boldyrmańyz jáne taza sý berińiz.

Sonymen qatar maldyń jaǵdaıyn tekserip otyryńyz, - deıdi Aýyl sharýashylyǵy mınıstrliginen. 

Eske sala keteıik, byltyr jazda elimizde mal sharýashylyǵynyń ónimdiligin arttyrýdy sýbsıdııalaý qaǵıdalaryna ózgerister engizildi.