Aqordaǵa saıahat jasaǵan oqýshylar alǵan áserimen bólisti
ASTANA. KAZINFORM – Halyqaralyq balalardy qorǵaý kúninde eldiń ár óńirinen Astanaǵa shaqyrylǵan 81 oqýshy Prezıdent rezıdentsııasy – Aqordaǵa saıahat jasady. Merekege oraı osyndaı múmkindikke ıe bolǵan balalar Kazinform tilshisine saıahattan alǵan áserin aıtty.
Saıahatqa kelgender arasynda halyqaralyq jáne respýblıkalyq olımpıadalardyń jeńimpazdary, oqý ozattary, shyǵarmashylyq pen sportta talantymen tanylǵan balalar, belsendiler men eriktiler boldy. Bıyl Aqordadaǵy saıahatqa tasqynnan zardap shekken óńirlerdiń balalary da shaqyrylypty.
Balalar áýeli Aqorda ǵımaratynyń birinshi qabatyndaǵy Ortalyq hollyna ótti. Munda olarǵa qurmet qaraýylynyń qatysýymen resmı qabyldaýlar ótkiziletini aıtyldy. Odan keıin jetkinshekter kelissózder men kezdesýler ótkizýge arnalǵan Shyǵys, Mármár jáne Saltanat zaldaryn, Memleket basshysynyń kitaphanasyn aralady. Oqýshylar Aqorda baǵynda serýendeýge de múmkindik aldy.
Saıahat kezinde oqýshylar Prezıdent rezıdentsııasymen baılanysty qyzyqty derekter estip, Memleket basshysynyń atynan estelik syılyqtar aldy.
Aqordadaǵy sapardan erekshe áser alǵan balalardyń ishinde Aqtóbe qalasyndaǵy Smart Bilim mektep-gımnazııasynyń 10 synyp oqýshysy Shámshi Baqytjan da bar. Ol sabaqtan tys ýaqytynda Art Lab mektebinde akterlik sheberlik, beıneleý sııaqty óner túrlerimen áýestenetinin aıtady. Byltyrǵy jeltoqsanda ózi oqıtyn mektepke Prezıdent kelgenin erekshe este saqtapty.
«Prezıdent bizdiń mektepke kelgende onymen tikeleı kezdesemin dep oılamaǵanmyn. Alǵash estigende ázil dep qabyldadym. Biraq shyn bolyp shyqqanda qatty tańǵaldym. Prezıdentpen kez kelgen adamnyń kezdesýge múmkindigi bola bermeıdi ǵoı. Sol kezde basyma Aqordanyń sýretin salý týraly oı keldi de, týyndyny Prezıdentke syıladyq. Aqordaǵa baryp, Prezıdent jumys isteıtin oryndy kórgimiz keldi», - deıdi Shámshi.
Oǵan Aqordadaǵy saparda Prezıdenttiń kabınetin aralaǵan sáti qatty unaǵan kórinedi.
«Búgin bári tamasha boldy. Biz Prezıdenttiń kabınetine kirdik, basqa da oryndardy, baspasóz máslıhatyn ótkizetin oryndy araladyq. Prezıdent otyrǵan orynǵa otyryp kórdim. Maǵan bárinen kıiz úıleri bar Shyǵys zal unady. Zal túgel qazaq oıýlarymen ádiptelipti. Men kútkennen áldeqaıda jaqsy bolyp shyqty. Bizge Aqordanyń shaǵyn bóligin ǵana kórsetetin shyǵar dep oılaǵanmyn. Al shyn máninde meniń kútkenimnen áldeqaıda áserli boldy. Búgin meniń úlken armanym oryndaldy», - deıdi oqýshy.
Al, almatylyq aıtysker oqýshy Іnjý Batyrhan búgin bala armandarynyń bir oryndalǵanyn aıtady.
«Búgin meniń armanym oryndalǵan kún desem bolady. Eldiń túkpir-túkpirinen jınalǵan daryndy balalarmen birge Aqordaǵa saıahat jasadyq. Maǵan bári unady, keremet. Sonyń ishinde Shyǵys zal erekshe kóńilimnen shyqty. Tóbedegi shańyraq, ishiniń jaryqtyǵy, otyratyn oryndarynyń jaılylyǵy este qaldy», - dedi aqyn qyz Іnjý Batyrhan.
Ol sóziniń sońyn myna óleń joldarymen:
«Bıik bop óre talǵamym,
Men óner jolyn tańdadym.
Dombyramdy serik qyp,
Jambyl izinen qalmadym.
Jetigendi de úırenip,
Aralap eldi sharladym», - dep túıindedi.
Araldan kelgen Amelııa Pak bul saıahattan týǵan qalasyna bolashaqta Aqordada jumys istesem degen arman arqalap bara jatqanyn aıtady.
«Búgingi saıahattan alǵan áserim óte kúshti. Aqordaǵa kelgenimen qýanyshtymyn. Bul saıahat maǵan úlken jiger beredi. Qazirden bastap jaqsy oqyp, jaqsy ýnıversıtetke oqýǵa túsip, Prezıdentpen birge jumys istesem degen maqsat paıda boldy. Jalpy ózimniń menedjer bolǵym keledi», - deıdi ol.
Bul saıahat balalarǵa Aqordadaǵy atmosferamen, Prezıdent jumysymen jaqyn tanysýǵa múmkindik syılady.
