Aqordaǵa aparatyn joldyń ózi jamaý-jamaý, quraq kórpege uqsaıtyn boldy - Prezıdent
«Biz bir apta buryn elimizdiń kólik-tranzıt áleýetin damytý máseleleri týraly arnaıy jıyn ótkizdik. Búgin avtojol ınfraqurylymy salasyndaǵy túıtkilderge erekshe toqtalǵym keledi. Bıyl 11 myńnan astam shaqyrym jolǵa ártúrli jóndeý jumystary júrgiziledi. Buǵan 600 mıllıard teńgeden astam qarjy bólindi. Jóndeý jumystaryn sozbalańǵa salýǵa bolmaıdy», - dedi Qasym-Jomart Toqaev.
Memleket basshysy jobalardy júzege asyrý barysyn qatań baqylaýǵa alý qajettigin basa aıtty.
«Joldyń sapasyna aıryqsha nazar aýdarý kerek. Elimizdiń joldary nashar ekeni jáne jol qurylysy salasyn jemqorlyq jaılaǵany eshkimge jasyryn emes. Tipti basqa jerdi aıtpaǵannyń ózinde, Aqordaǵa aparatyn joldyń ózi jamaý-jamaý quraq kórpege uqsaıtyn boldy», - dedi Qazaqstan Prezıdenti.
Prezıdenttiń atap ótýinshe, jalpy, bul salada qordalanǵan másele kóp.
«Tenderdi jyl saıyn birli-eki kompanııa ǵana utyp alady. Mundaı jaǵdaıdyń qaıtalanyp kele jatqanyna ondaǵan jyl boldy. Sonyń bárin retke keltirý úshin shuǵyl sharalar qabyldaý kerek. Jarty jyl ótti. Al jol jóndeýge bólingen qarajattyń 44 paıyzyna memlekettik satyp alý qorytyndysy jasalǵan joq. Bul jumys Pavlodar, Mańǵystaý jáne Batys Qazaqstan oblystarynda óte baıaý júrgizilýde», - dedi Qasym-Jomart Toqaev.
