Aqordada Vladımır Pýtındi saltanatty qarsy alý rásimi ótti
Memleket basshysy Qasym-Jomart Toqaev resmı saparmen kelgen Reseı Federatsııasynyń Prezıdenti Vladımır Pýtındi Aqordada qarsy aldy, dep habarlaıdy Kazinform.
Mártebeli meımannyń saparyna oraı Saltanatty rásimder zalynda qurmet qaraýyly sap túzep, onyń bastyǵy Memleket basshylaryna sálemdik baıanat berdi. Osydan keıin Prezıdenttik orkestr eki eldiń memlekettik ánurandaryn oryndady. Ánurandardy tyńdap bolǵannan keıin Vladımır Pýtın pen Qasym-Jomart Toqaev kilemshe boıymen Qazaqstan Respýblıkasynyń Memlekettik Týyna qaraı júrdi. Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń meıman men Prezıdent qurmetti qaraýyl sapynyń boıymen júrdi. Reseı basshysy qurmetti qaraýyl bastyǵymen qoshtasty.
Qazirgi ýaqytta Prezıdentter Qostanaıda ótip jatqan Qazaqstan men Reseıdiń óńiraralyq yntymaqtastyq forýmyna beınebaılanys rejıminde qatysyp jatyr.
Buǵan deıin Memleket basshysy Qasym-Jomart Toqaev Qazaqstanǵa resmı saparmen kelgen Reseı Prezıdenti Vladımır Pýtındi elorda áýejaıynda qarsy alǵanyn jazǵan edik.
Eki el basshylary kelissóz júrgizip, Qazaqstan men Reseı arasyndaǵy strategııalyq seriktestiktiń ózekti máselelerin talqylaıdy dep josparlanǵan. Budan bólek, Prezıdentter Qostanaıda ótetin Qazaqstan men Reseıdiń XIX Óńiraralyq yntymaqtastyq forýmyna beınebaılanys rejıminde qatysatyny aıtyldy.
Elder arasyndaǵy taýar aınalymy, ınvestıtsııa kólemi jáne forýmda qandaı máseleler qaralatyny Kazinform sarapshysynyń sholýynda.
