Aqordada Memlekettik xatshynyń tóraǵalyǵymen vedomstvolyq nagradalar jónindegi geraldıkalyq komıssııanyń ekinshi otyrysy boldy
ASTANA. 2 qaraasha. QazAqparat - Búgin Aqordada Memlekettik xatshy Muhtar Qul-Muhammedtiń tóraǵalyǵymen QR Prezıdenti janyndaǵy konsýltatıvtik-keńesshi organ - vedomstvolyq nagradalar jónindegi geraldıkalyq komıssııanyń ekinshi otyrysy bolyp ótti.
Bul týraly QR Prezıdentiniń baspasóz qyzmeti habarlady.
Memlekettik hatshy túrli mekemeler men memlekettik organdar qyzmetkerleriniń táýelsiz Qazaqstannyń qalyptasýy men damýyna qosqan qomaqty úlesin atap ótti.
«Elbasy óziniń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» strategııalyq maqalasynda adam eńbegi laıyqty baǵalanýǵa tıis ekenin atap ótti. Sondyqtan vedomstvolyq nagradalar árbir qazaqstandyq úshin mándi, baıypty stımýl bolýy kerek. Joǵary patrıottyq sezimdi, Otanǵa qyzmet etý paryzyn qalyptastyrýda adamdardy der kezinde eńbegi men erligi úshin laıyqty moraldyq jáne materıaldyq marapattaý óte mańyzdy. Jurtshylyqtyǵ erekshe yqylasy adamnyń óz kúshi men múmkindigine degen senimin kúsheıtedi. Al bul óz kezeginde tańdap alǵan iste joǵary maqsattarǵa jáne bıik nátıjelerge jetýde oń yqpalyn tıgizedi» dedi M.Qul-Muhammed.
Memlekettik hatshy dúnıe júzinde bolyp jatqan jahandyq ózgerister, sondaı-aq táýelsiz Qazaqstannyń ishki damý logıkasy ýaqyttyń jańa talaptaryna ulttyq quqyqtyń sáıkesýin talap etetinin atap ótti. Normatúzýshilik jáne quqyq qoldaný praktıkasyn odan ári jetildirý qajettiligi osyǵan baılanysty týyndap otyr.
Otyrys barysynda Memlekettik qyzmet isteri agenttiginiń tóraǵasy Á. Baımenov memlekettik organdardan kelgen usynystar týraly aqparat berdi.
Otyrysty qorytyndylaı kele, M. Qul-Muhammed qoldanystaǵy nagradalar ataýlaryndaǵy ártúrlilikterge, dálsizdikterge jol bermeý, olardyń syrtqy bezendirilýine erekshe kóńil bólý qajettiligin atap kórsetti. Nagradalar eńbeksúıgishtik pen erliktiń dárejesin, el ekonomıkasyn, mádenıetin, ǵylymy men ónerin damytýǵa qosqan jeke úlesti tolyqtaı kórsetýge tıis.
Otyrys qorytyndysy boıynsha tıisti qurylymdarǵa usynymdar men naqty tapsyrmalar berildi.
