Aqordada memlekettik nagradaǵa usynylatyn kandıdattar anyqtaldy

ASTANA. QazAqparat - QR Memlekettik hatshysy Gúlshara Ábdiqalyqovanyń tóraǵalyǵymen Qazaqstan Respýblıkasynyń Prezıdenti janyndaǵy Memlekettik nagradalar jónindegi komıssııanyń otyrysy ótti.

Bul týraly Aqordanyń baspasóz qyzmeti habarlady.

Komıssııa otyrysynda memlekettik organdar men qoǵamdyq birlestikterden kelip túsken Qazaqstan Respýblıkasynyń memlekettik nagradalarymen marapattaý jónindegi usynystar talqylandy.

Otyrys qorytyndysy boıynsha Komıssııa músheleri marapattaý úshin Memleket basshysynyń qaraýyna usynylatyn kandıdattardy anyqtady. Memlekettik nagradalardy tapsyrý dástúr boıynsha Táýelsizdik Kúni qarsańynda ótkiziledi.

Qazaqstan Prezıdenti janyndaǵy konsýltatıvtik-keńesshilik organ bolyp sanalatyn komıssııa Qazaqstan Respýblıkasynyń memlekettik nagradalaryn bekitý jáne joıý jónindegi usynystardy, nagrada máseleleri jónindegi zańdardyń jobalaryn jáne basqa da normatıvtik quqyqtyq aktilerdi, marapattaý týraly usynymdardy jáne ózge de máselelerdi qarastyrady.