Aqordada Qazaqstanda padel sportyn damytý perspektıvasy talqylandy

ASTANA. KAZINFORM — Qasym-Jomart Toqaev Halyqaralyq padel federatsııasynyń (FIP) prezıdenti Lýıdjı Karraro men Premier Padel álemdik kásibı týrynyń tóraǵasy Nasser Ben Ganım Ál-Helaıfıdi qabyldady. Bul týraly Aqordanyń baspasóz qyzmeti habarlady. 

Kezdesý barysynda Qazaqstanda padel sportyn damytý perspektıvasy talqylandy. Búginde elimizde 1,5 myńnan astam oıynshyny biriktiretin qoǵamdastyq qalyptasyp, 16 oblysta óńirlik federatsııa quryldy.

Prezıdent memlekettiń buqaralyq sportty órkendetýge jáne zamanaýı ınfraqurylym jasaqtaýǵa aıryqsha kóńil bólip otyrǵanyn atap ótti.

Qazirgi kezde elimizde padel oıynyna arnalǵan 17 kort bar. 2027 jyly Almaty qalasynda halyqaralyq standartqa saı keletin 10 korty bar ADD PADEL ARENA sport keshenin ashý josparlanyp otyr. Ortalyq Azııadaǵy zamanaýı sport nysandarynyń birine aınalatyn bul arenada Premier Padel deńgeıindegi týrnırlerdi uıymdastyrýǵa bolady. 

Prezıdent fýtboldy damytý máselesine de arnaıy toqtaldy. Qasym-Jomart Toqaev elimizde fýtbol klýbtaryn jekeshelendirý jáne básekeles orta qalyptastyrý sharalary júrgizilip jatqanyna nazar aýdardy.

Prezıdent ÝEFA Atqarýshy komıtetiniń múshesi jáne «Parı Sen-Jermen» klýbynyń aktsıoneri retinde fýtboldy nasıhattaýǵa qosqan úlesi úshin Nasser Ál-Helaıfıge alǵys aıtty.

Kezdesý sońynda Memleket basshysy Qazaqstannyń Halyqaralyq padel federatsııasymen yntymaqtastyǵyn nyǵaıtý elimizde osy sport túrin damytýǵa ári tanymaldylyǵyn arttyrýǵa yqpal etetinine senim bildirdi.

Aıta ketelik, Almaty Open ATP 250 álemdegi úzdik týrnırlerdiń qataryna kirdi.