Aqordada elimizdiń Memlekettik týy kóterildi

NUR-SULTAN. QazAqparat – Búgin QR Tuńǵysh Prezıdenti kúni merekesine oraı josparlanǵan merekelik sharalar dástúr boıynsha Aqordada bastaldy. Prezıdenttiń bas rezıdentsııasynda elimizdiń Memlekettik týy kóterildi. QazAqparat bul týraly «Habar 24» telearnasyna silteme jasap habarlaıdy.

Qarýy saılanǵan, symdaı tartylǵan sarbazdar bıyl da sap túzedi. Memlekettik kúzet qyzmeti «Aıbyn» prezıdenttik polkiniń Qurmet qaraýyl rotasy kók baıraqty Aqordanyń aldyna alyp keldi.

Komanda berilgen soń Qazaqstannyń Memlekettik týy kóterilip, Gımn shyrqaldy.

1991 jylǵy 1 jeltoqsanda búkilhalyqtyq saılaý nátıjesinde elimiz óziniń tuńǵysh Prezıdentin Nursultan Nazarbaevty saılady jáne osy kúnnen táýelsizdik tarıhy bastaldy. 2011 jylǵy 14 jeltoqsanda «Qazaqstan Respýblıkasyndaǵy merekeler týraly» QR Zańyna tolyqtyrýlar engizý týraly» Zańyna qol qoıyldy. Oǵan sáıkes, 1 jeltoqsan memlekettik mereke - Qazaqstan Respýblıkasynyń Tuńǵysh Prezıdenti kúni retinde belgilendi.